Parlamentario di AVP, Jennifer Arends-Reyes:
ORANJESTAD (AAN0) - Lider di fraccion di Partido di Pueblo Arubano, Jennifer Arends-Reyes, kende ta un profesional di mundo di enseñansa ta tuma nota cu un gran cantidad di tema di discusion den comunidad ta keda bay bek na e sector aki. Por ehempel, siguridad alimenticio, escasez grandi di trahado y profesional y en particular e asina y yama ‘brain-drain’ cu ta ora hobennan cu ta caba estudio den exterior no kier regresa Aruba, sea paso no tin oportunidad pa nan profesion of pa progresa.
Pa esunnan cu si ta desea di bin bek, mester traha pa crea e incentivo cu por ofrece un bida cu potencial y prosperidad. Un di e stapnan pa stop di bende cas cu persona cu no kier biba na Aruba. Tambe mester mehora e sistema di kinderopvang y haci di pasantia/stage un parti integral den enseñansa. Cera acuerdo cu sector priva ta un win-win situation.
E aspectonan aki y varios otro mas mester ta inclui den un plan strategico di innovacion y digitalisacion den enseñansa manera a introduci na nos isla ruman di Corsou. Nan a ricibi ayudo como regalo di decenas di miyones for di Hulanda durante temporada di Covid pa yuda pasa e temporada y pa remedia despues, e parlamentario a indica.
Aruba a keda lucha y te awe nos tin un gap grandi pa locual ta trata, por ehempel, e mantencion di scolnan, mas ainda cerca esunnan cu ta cay bou di fundacion; infrastructura di coriente y deportivo, y hasta proyecto pa scolnan nobo secundario cu a keda para. Y ora cu caba nan mes, ainda no ta e scenario ideal cu a priminti ya cu no a planifica, por ehempel, e trafico den vecindario of espacio pa recreacion pa e cantidad di alumno. Hopi ta e retonan cu tin y esey ta sin papia ainda di e presion cu tin bou di e maestronan.
“Si nos kier papia di mehora calidad di enseñansa,tin cu cuminsa na amplia oportunidad pa tur scol beneficia, no un grupo so,” ta e firme opinion di Arends-Reyes. Nos isla mester ‘catch-up’ lihe cu tecnologia, pa cera e gap cu despues e studiantenan lo haya den scol avansa of na pia di trabou. Innovacion y material mester ta accesibel pa tur scol y no via proyecto cu ta forma un drempel halto y hopi scol ta keda afo. Despues di purba atrobe un par di biaha, e scol ta resigna y stop.
Scolnan mester enfoca riba enseñansa y no con pa recauda fondo pa cumpli cu necesidadnan. P’esey un plan strategico nacional ta necesario pa suministra e scolnan riba corto y largo plaso. En berdad a tuma nota tambe di esfuerso pa instala internet di fibra optico na scol na un prijs reduci, cual sigur ta un stap positivo. Ta spera di por mira mas iniciativa similar na fabor di innovacion den enseñansa.
Parlamentario Arends-Reyes lo keda monitor, sostene y boga na fabor di mas material, entrenamento y miho condicionnan pa alcansa avancenan den enseñansa di un manera structura y integral.
