Clifford Heyliger (AVP):
ORANJESTAD (AAN): Manera tabata di spera, hopi puyito ta saliendo for di e macuto cu tabata Gabinete Wever-Croes II. Den apenas un par di siman despues cu e gobierno nobo a tuma mando, a bin scucha di miyones di placa di pueblo cu a bay pa proyecto den deporte cu no a mira luz di dia. Tambe con a duna dos permiso di frecuencia radial na media cu a priminti fabor politico y con friends & family di MEP apunta den hunta di comisario na e diferente companianan estatal a cambia statuto pa regala nan mes schat di placa den nan salida.
Enfoca riba e aspecto di maneho di Utilities Aruba N.V. (UA), parlamentario Clifford Heyliger a trece un punto mas pa tene cuenta cu ne, den henter e situacion reinando na WEB Aruba N.V. y esey ta e motibo tras di e creacion di un compania nobo bou di e capa di UA cu yama Aruba Renewable Energy. Supuestamente cu e tarea di asumi for di WEB tur loke ta compra di ekipo of energia.
Esaki, segun Heyliger, ta haci cu WEB no por scoge loke ta miho pa WEB, pero mester djis traha segun loke Utilities dicta. Un ehempel cla di esaki ta e contract di 20 aña pa 1 biyon florin cu Eagle LNG cu a forsa riba WEB Aruba. Tambe por corda con a kita dos director WEB pa habri caminda pa cera e deal aki cu Eagle LNG.
Pero cu mientras e fraccion di MEP den parlamento, den su mayoria ministernan den e gabinete anterior, ta briya cu nan silencio den e asunto aki of ta bolbe na e maña di bisa cu “e no sa di nada”; parlamentario Heyliger ta tuma bon na serio su responsabilidad como representante di pueblo y p’esey den conferencia di prensa diamars mainta ta duna un bista di e preguntanan cu e ta mandando pa gobierno.
Manera ta conoci, Mike de Meza te ainda ta stroba di por huramenta y asumi e Ministerio di Energia, Infrastructura y Telecomunicacion y na su luga ta reemplasa temporalmente pa Minister Arthur Dowers. Parlamentario Heyliger ta yama e ultimo aki pa bin Parlamento di Aruba y indica si e ta na altura di loke ta sosodiendo entre Utilities Aruba N.V. y WEB Aruba N.V. cu director y hunta di comisario. Tambe kier scucha ki accion ta tumando pa proteha e bienestar di nos compania di awa y si a pidi e retiro inmediato di e hunta di comisario di WEB y Utilities.
Por ultimo tin un mensahe na e fraccion di MEP: “Si di berdad bo integridad ta halto; si di berdad bo ta sinti pa profesional den gobierno cu bo ta bisa cu AVP ta ataca; bin sali na nan defensa awo. Bin sali na defensa di trahadornan di WEB, Elmar, RDA y Aruba cu ta bay bira e dupe y sufri pa via di un maneho desastroso di Ton Rojer y tur su hendenan.”
