Parlamentario Marco Berlis trahando riba un iniciativa di ley di Referendum

ORANJESTAD (AAN):  Parlamentario Marco Berlis (MEP) ta indica cu ta masha comun ora ta scucha hendenan ta comenta atraves di emisoranan radial riba varios tema y preocupacionan cu ta reina den pueblo.

            Ademas riba rednan social tambe por scucha hendenan expresa nan opinion y na varios ocasion ta exigi un referendum pa laga pueblo dicidi riba cierto temanan cu ta delicado y importante pa pueblo. Ultimamente,“Mester laga un referendum dicidi” ta un expresion basta comun usa den pueblo.

                Ora mi a bay busca e ley di referendum pa compronde cual ta su contenido, pa mi asombro mi no por a hay'e niun caminda! Mesora mi a bai puntra diferente expertonan di ley pero niun hende no por a hay’e. Di e forma aki mi a bin compronde cu pais Aruba no conoce un “Ley di Referendum.” 

Aruba no tin un “Ley di Referendum”

            Mientras cu otro paisnan den Reino tin referendum hancra den nan ley, Aruba no tin esaki. Tin un sentimento bao pueblo cu afirmativamente tin referendum caba den nos Constitucion, pasobra pueblo ta papia di esaki. Sigur tin un sentimiento den pueblo cu nan lo desea di haci uso di e herment aki pa yuda dicidi e direccion di e pais riba cierto temanan. Pero manera ma bisa anteriormente, referendum no ta hancra den nos Constitucion. 

Un ley di Referendum ta fortifica e bos di pueblo y democracia en general

            Un referendum ta wordo considera como un herment hopi importante pasobra e ta fortalece e bos y decision di pueblo den un pais. Un democracia ta mas completo y fuerte door di tin referendum den su ley.

            Na hopi pais democratico e referendum ta bon hancra den ley y por ser usa pa trata temanan importante cu por impacta e sociedad socialmente y moralmente. Aunke cu un pueblo tin su representantenan den un Parlamento, Senado of Congreso, e referendum ta un herment esencial pa sigura cu e bos di pueblo por wordo scucha y refleha den cualkier decision di e organonan halto aki riba topiconan cu ta di gran importancia pa un sociedad “groot maatschappelijk belang”.

            Cu un ley di referendum pueblo por pone extra presion den decisionnan clave di nos pais. Pa tur e motibonan aki y mas, pueblo di Aruba merece un “ley di referendum”. 

Parlamentario Marco Berlis trahando riba un iniciativa di ley di Referendum

            Na comienso di 2023 a cuminsa traha riba un ley di iniciativa di referendum pa pais Aruba. E ley ta canando den su trayecto caba. Como Parlamentario mi conoce e curason di pueblo den cual mi ta trahando dia y anochi. Ta den cuadro di esaki awo como representante di pueblo mi deseo ta pa empodera pueblo pa por ta parti di decisionnan importante cu mester wordo tuma den Parlamento.

            Como representante di pueblo mi compromiso ta pa traha duro pe ley aki por keda cla pronto y cu e bos di pueblo por resona y ser respeta mas cu nunca. Durante e temponan nos dilanti mi lo keda informa pueblo con e proceso di e ley di iniciativa ta canando.