Parlamentario Ricky Hoek (MEP):
ORANJESTAD (AAN): Diahuebs ultimo tabatin un e Encuentro Publico (OB) den Parlamento, caminda cu Prome Minister sra. Evelyn Wever-Croes a bin duna un update riba e acuerdo firma di 6.9% cu Hulanda.
Den e ronda di pregunta henter oposicion a bin cu algun pregunta relata na e firmamento di e acuerdo, pero lo mas a resalta ta cu a trece topiconan dilanti cu no tabata alcaso e momento ey y sin base. Un ehempel ta cu Parlamentario De Meza a trece storianan sin base dilanti pasobra e ta nenga di acepta e realidad, como ex-Minister, di e mal maneho financiero di su Gobierno entre 2009 y 2017.
E Parlamentario di mas aña den Parlamento, sra. Wyatt-Ras, ta insulta Prome Minister pa ta ‘inepto’ pasobra a firma acuerdo cu segun su persona no ta cumbini Aruba. Ambos Parlamentarionan independiente Croes y Santos do Nascimento, ta cuestiona e base legal di e acuerdo firma. Segun nan, Minister di Finansa sra. Xiomara Maduro no a cumpli cu ley di Comptabilidad. Nan cu tin un background huridico y un trayectoria den AVP y a manda pregunta pa Tweede Kamer, no por compronde dicon e acuerdo firma door di Aruba ta legal. E procedura ta legal, pasobra na momento cu Parlamento a aproba e Presupuesto 2023, esaki tambe a duna e Minister di Finansa e autorisacion/apoderacion pa firma acuerdonan financiero cu Hulanda..
Marisol e pio ehempel
E parlamentario cu a laga pueblo di Aruba cay manera un patia berde, ta e politico cu 26 aña di experiencia, ex-Presidente di Parlamento di Aruba y dos bes den funcion di minister, esta Marisol Lopez-Tromp.
Parlamentario Lopez-Tromp den su disertacion publicamente ta defende Tweede Kamer, caminda e ta bisa cu Gobierno di Aruba no ta tene cuenta cu e preocupacionnan di Hulanda ni tampoco cu e pagadonan di belasting Hulandes. Acaso Marisol Lopez-Tromp a sali na defensa di e pagadonan di belasting Arubiano? Bo a wak un dia Marisol Lopez-Tromp bisa publicamente cu e no ta di acuerdo cu e porcentahe halto di 6.9% compara cu e 5.1% di Corsou y 3.4% di Sint Maarten, cu Hulanda a straf Aruba cu ne?
Con un persona, un politico cu decadanan di experiencia, no por vocifera e inhusticianan cu Hulanda ta comete contra di pueblo di Aruba? Dicon Marisol Lopez-Tromp no ta publica su preguntanan cu e la haci na mei 2022, cu e ta contra e RAft como cu Hulanda kier impone riba Aruba? Pakico Marisol no ta bisa cu el a sostene presupuestonan di AVP cu a conduci na supervision financiero?
Awe, cu pecho halsa e ta cuestiona e trabounan duro cu tanto Prome Minister, Minister di Finansa, pero mas ainda nos profesionalnan financiero local, di no a haci un bon trabou.
Marisol den e OB di 19 di october 2023, a demostra di ta pro Parlamento Hulandes y pueblo Hulandes, lagando su pueblo di Aruba un banda.
Tin influencia di Hulanda riba oposicion?
Si analisa e OB di diahuebs mainta, ta parce cu Hulanda (Secretario di Estado, Tweede Kamer, BZK, y otronan) ta influencia oposicion completo pa asina yuda nan yega na poder. Esaki ta berdad? Si oposicion no por bisti e pechi di ARUBA y defende nos pueblo contra inhusticia y neocolonialismo Hulandes, e ora pueblo ta core riesgo pa tin un futuro prospero.
