Parlamentario Ricky Hoek (MEP) presente na Foro Nacional pa Adulto Mayor :
e calidad di bida di e adulto mayor
ORANJESTAD (AAN): Durante 17 y 18 di October ultimo tabata tin e Foro Nacional pa Adulto Mayor. Esaki tabata prome biaha cu Gobierno di Aruba ta organisa un foro nacional na e nivel aki enfocando riba e adulto mayor.
Parlamentario di Fraccion di MEP, Ricky Hoek tabata ambos dia presente na Hilton Hotel, caminda e foro a tuma lugar cu presencia di representantenan di Gobierno, Parlamento y stakeholders.
Pakico e Foro Nacional pa Adulto Mayor? Hoek a declara cu considerando cu e poblacion di Aruba ta den un proceso di embehecimento (vergrijzing) rapido, cual por mira cu tambe ta un fenomeno mundial, global, pesey kier pone enfoke riba e grandinan.
"Tin cu tene cuenta cu nos adultonan mayor a traha e fundeshi pa nos. Nan a traha infrastructuranan pa nos, nan a yuda traha e economia cu nos tin awendia. Nan a aporta grandemente na e caminda cu Aruba ta awe. Pesey mi ta kere ta hopi importante cu gobierno di Aruba, Gabinete Wever-Croes II, particularmente Minister Ursell Arends a bin cu e Foro Nacional aki pa conhuntamente cu diferente stakeholder di parti di gobierno, sector priva y sector publico, comercio, gremionan, tur ta bin hunto pa asina traha y pone ideanan hunto pa loke ta trata e asunto di adultonan mayor", a expresa.
Parlamentario Hoek a agrega cu Gobierno di Aruba, a presenta por medio di Minister Arends e asina yama 'Delta Plan 2023-2033', cual ta un plan dirigi na e adultonan mayor pa asina traha structuralmente na e bienestar di e calidad di bida, mobilidad y participacion social di e adultonan mayor.
Kico gobierno ta haci pa loke ta bienestar y calidad di bida di e adultonan mayor?
Hoek a indica cu si ta wak den e ultimo añanan, Gabinete Wever-Croes II a enfoca riba e calidad di bida di e adultonan mayor. Tambe tin plannan fiscal cu a keda introduci desde e aña aki, tin reformanan cu a bin pa dilanti. Banda di esaki a mehora e pension di e grandinan cu un aumento di 3 %.
Pesey cu e Foro Nacional aki dedica na e adulto mayor Gobierno di Aruba ta presenta un plan structural pa traha riba nan calidad di bida, a bisa. Parlamentario Ricky Hoek a menciona cu un punto hopi importante cu a bin dilanti ta entre otro vivienda. Ta conoci cu tin un lista di espera bastante grandi pa personanan adulto cu kier drenta den un cas di cuido. "Esaki nos no por duna inmediatamente pasobra e capacidad ta limita y tin un demanda basta grandi pa cu esaki".
Banda di esaki tin e demanda di transporte, demanda di cuido personalisa pa e adultonan mayor. Tin e parti di participacion social caminda kier pa e adultonan mayor ta mas activo den comunidad haciendo mas movecion. Relaciona cu tur esaki Gabinete Wever-Croes II a bin cu e plan structural aki. Asina lo por atende cu e problema di vivienda, di salud, di participacion social, di mobilidad, di transporte, tambe e parti financiero-economico cu por yuda e adultonan mayor sinti nan mes balora, inclui den comunidad y tambe por sigui participa y funciona como ciudadanonan ehemplar, e Parlamentario a expresa.
El a finalisa bisando cu e grandinan ta e tesoronan, e baluartenan di Aruba. Hendenan cu a aporta hopi na comunidad y ta momento pa "nos tur" duna nan algo bek.
