Evelyn Wever-Croes y MEP ta felicita Prome Minister nobo di Hulanda Rob Jetten

ORANJESTAD (AAN): Lider di fraccion di MEP Evelyn Wever-Croes a felicita prome minister nobo di Hulanda Rob Jetten di partido D’66, cu a huramenta dialuna mainta.

   “Mi a conoc’e como un colega minister, un politico hoben, dinamico y ambicioso, cu un gran curason pa pueblo di Hulanda. Un hende cu sa scucha, conecta cu otro y no ta evadi responsabilidad. Un persona cu interes genuino den e bienestar di e demas paisnan di Reino”, segun Evelyn Wever-Croes.

   Rob Jetten tabata na Aruba na 2023 pa e prome conferencia di energia y clima di Caribe, cu a wordo organiza pa Rob Jetten y Evelyn Wever-Croes. Durante e periodo ey, el’a duna su compromiso na sigui yuda Aruba transiciona pa energia mas limpi, y a compromete cu Aruba lo haya fondonan pa esaki. Recientemente e prome minister anterior di Hulanda, a anuncia cu e fondonan aki ta inclui den e presupuesto di Hulanda pa 2026.

   “Awor e ta asumi liderazgo di Hulanda. Esaki no ta solamente un gran honor, sino tambe un responsabilidad especialmente den un tempo caminda confianza, stabilidad y vision ta mas importante cu nunca. Mi a desea Prome Minister Jetten sabiduria den su decisionnan, fortalesa den momentonan dificil y, mas cu tur cos, e balentia pa pone interes general semper na prome lugar. Cu su liderasgo por ta guia pa integridad y dedicacion sincero na cada habitante di Hulanda y di Reino Hulandes”, Evelyn Wever-Croes a finalisa bisando.