Evelyn Wever-Croes:
ORANJESTAD (AAN): Lider di Fraccion di MEP, Evelyn Wever-Croes, ta hopi preocupa pasobra Aruba no tin un Minister Plenipotenciario (GevMin) na Hulanda. Mientras AVP y Futuro ta bringa cu otro pa poder, nos pais ta keda sin un persona cu mester defende nos den cura di Reino.
Un obligacion, no un opcion: Evelyn ta splica cu Statuut, e ley di mas halto di nos pais, ta obliga Gobierno pa tin un Minister na Hulanda. No ta un cos cu nan por dicidi si nan kier of no; nan mester tin e. Te hasta e hefe di Raad van State di Hulanda mes a bin Aruba y bisa Parlamento cu esaki ta hopi importante.
“Gobierno ta manda diferente minister tur luna djis pa un reunion, pero esey no ta e trabao. Un GevMin mester t’ey tur dia pa lobby y vigila nos interesnan. Mandando un diferente persona cada bes, bo no ta cubri nada y bo ta laga Aruba debil,” Evelyn a duna di conoce.
Pleito den coalicion: E motibo pakico no tin un GevMin ta e falta di union den e Gobierno aki. Na december, AVP a presenta un mocion contra su mesun partner, Futuro, pa purba forsa nan pa nombra un hende. E pleito aki tabata visibel den Parlamento: prome Futuro a vota contra, y despues bou di presion nan a vota na fabor.
“A pasa dos luna caba y nada no a cambia. Aki bo ta mira cu e ministernan ta mas ocupa cu nan pleitonan interno cu cu e bienestar di Aruba. Nan no por bini hunto pa dicidi riba un nomber, y e unico cu ta paga e prijs ta pueblo,” e lider di MEP a enfatisa.
Consecuencia pa Aruba: Pa Evelyn Wever-Croes, e situacion aki ta serio. “E friccion entre AVP y Futuro ta perhudica nos tur. Mientras nan ta bringa, nos interesnan na Hulanda ta keda na peliger. Mi ta spera cu Gobierno stop di hunga politica den cura y cuminsa goberna cu responsabilidad, nombrando un GevMin pronto prome cu e daño pa Aruba bira mas grandi.”
