A yega ora pa reunionnan di Tripartiet mester tin resultado concreto

Eduard Pieters (PPA):

ORANJESTAD (AAN): Durante e clausura di e prome reunion Tripartiet cu parlamentario Eduard Pieters di fraccion di PPA ta experencia a para firme riba un punto esencial: cooperacion den Reino Hulandes no por keda na dialogo diplomatico sin meta concreto. E reunionnan tripartiet ta costa placa, tempo y recurso. Pueblo di Aruba merece resultado midibel, no solamente agenda largo cu punto sin accion.

   Geschillenregeling: Ainda den proceso, sin claridad!  Un di e topiconan central tabata e famoso geschillenregeling. Eduard Pieters a cuminsa na indica cu: “Segun loke a comparti cu nos, ta  cu actualmente e concepto ta na Raad van Staten. Aworaki nos ta warda conseho pa sa kico ta e siguiente pasonan. Pero e pregunta politico cu PPA a haci ta legitimo: Con leu e proceso aki lo sigui den espera?”

   Un regeling di disputa no ta un luho huridico; ta un instrumento fundamental pa protega posicion di e paisnan autonomo den Reino. Sin clarificacion rapido, nos ta laga un asunto constitucional crucial keda den limbo. Sin e instrumento aki nos lo keda cu poder unilateral di Hulanda riba e islanan sin por bay den disputa, manera aplicacion di articulo 36 di Statuto di Reino Hulandes.

   Food Security: aplaudi, pero cu vigilancia! Gobierno di Aruba a presenta un bon exposicion riba Food Security y con nos por colabora cu otro isla. “Fraccion di PPA ta aplaudi e iniciativa. Aruba mester reduci dependencia externo y fortalece produccion local. Pero e reflexion critico ta necesario. Si Aruba actualmente ta produci aprox. 15% di su consumo di webo y e meta ta aprox. 93%, esaki ta implica dramaticamente mas produccion. Mas produccion ta nifica mas galiña. Mas galiña ta nifica mas afval. Mas afval ta nifica potencialmente mas contaminacion di suela y awa subterraneo. Desaroyo sin regulacion no ta progreso, sino un riesgo den futuro,” Eduard a enfatisa.

   PPA ta insisti cu cada inversion den produccion alimenticio mester bay hunto cu: monitoreo ambiental serio, uzo corecto di tecnologia, midimento constante di contaminacion y plan di mitigacion. No por ta asina, cu solucion pa dependencia alimentario, mester bira problema ambiental despues.

   Costo di biahe y conexion den Reino! Pieters a comparti un punto: “Un di e topiconan cu a bin dilanti y cu tin basta tempo ta papiando di dje, ta e prijs di pasashi pa biaha entre e islanan den Reino, cu ta hopi caro. E discusion a bay riba con por baha e costo y haci movilidad mas accesibel. Triple AAA a propone un terminal separa pa Reino Hulandes, cu por reduci tempo di espera na aeropuerto for di 3 ora pa por ehempel 45 minuut. Esey ta djis pa menciona un ehempel. E concepto ta interesante, pero mester evalua esaki hopi bon y cu cifra concreto tocante: Cuanto e inversion aki ta? Kico ta e impacto real riba prijs di ticket? Con e lo beneficia ciudadano comun?”

   Vergrijzing: un crisis comun cu mester accion comun: “Vergrijzing ta un topico comun den Reino: Aruba: 20% di poblacion ta 65+ y Curaçao: 25%

   Esaki no ta estadistica inventa, pero un presion real riba cuido, pension y finansa publico. PPA ta boga pa un sistema coordina entre e paisnan, pa mitiga e efecto devastador cu esaki por tin riba adulto mayor”.

Pero cooperacion mester traduci den plan concreto, no solamente comparacion di cifra.

   Structura di Tripartiet: unda e meta ta: Un punto fundamental cu PPA a trece dilanti ta falta di meta specifico den e topiconan cu ta wordo trata. Actualmente tin agenda, pero no tin claridad riba: (*) Kico exactamente nos kier logra? (*) Con nos ta midi progreso? (*) Con nos ta evalua despues di cada reunion si a logra e meta? (*) Ki palabracion nos ta haci ora cu nos no logra e meta?

  P’esey PPA ta sostene pa implementa un structura mas fuerte: (*) Topico general cu meta strategico comun entre e islanan. (*) Subtopico specifico cu ta wordo stipula durante preparacion di cada Tripartiet

Meta concreto y midibel. (*) Punto di accion. (*) Evaluacion posterior.

   Sin esaki, e reunionnan ta core riesgo di bira ritual diplomatico sin impacto real na bienestar di nos tur nos ciudadanonan riba e islanan du Curaçao,  St. Maarten y Aruba. Ademas di haci Reino Hulandes mas fuerte. Un comision ta bin bek riba structura den un encuentro online na april y pa luna di juni mester tin un modelo mas coordina, funcional, efectivo y eficiente.