Erich Jacinto Genser awor riba lista di MEP ta mustra cu su caracter ta pa yuda hende y yuda su pais

ORANJESTAD (AAN): Riba Dialuna atardi, Partido Mep a keda introduci e candidatonan nobo cu a aparece riba lista, pa asina publico conoce nan di cerca.

   Erich Jacinto Genser tambe ta uno cu a wordo introduci.  Erich tin 37 aña y ta casa cu Juf. Ghislady Genser-Angela y hunto nan tin 3 yiu. MEP a indica cu Genser ta un hoben dinamico cu curason humilde y cla pa traha pa nos pais.

   “Desde hoben caba mi tabata tin anhelo pa ta den politica. Awo como adulto tata di famia y esposo e anhelo a bira mas fuerte. Un punto fuerte di mi caracter ta yuda hende y asina mi kier yuda mi Pais caminda mi a nace y ta stima manera mi yiu ta bisa ‘duro duro’. Kisas mi no ta un profesional den tur area pero mi curason ta pa Aruba pa un Aruba fuerte, uni y stabiel. Un Aruba unda cu cada un ciudadano ta duna di su banda pa completa loke falta. Un comunidad consciente y presente na tur momento.

E motibo cu mi a scoge pa forma parti di Movemiento Electoral di Pueblo ta pasobra den un momento asina dificil cu henter mundo a pasa aden, MEP a demostra cu e ta traha pa e bienestar di pueblo cu nos den mente, pa cu futuro y stabilidad como pais. Mi kier a gradici na prome luga Dios pa e oportunidad cu e ta duna mi aworaki cu mi ta cuminsa mi careda politico. Na full team di MEP y nos lider Señora Evelyn Wever-Croes pa acepta mi riba e lista prestigioso aki.

Como prome Minister Señora Evelyn Wever- Croes a sa di goberna y dirigi e pais aki sublimemente. Lamentablemente a bin e pandemia cu a pone cu hopi plan y proyecto mester a worde para. Mi tin hopi respet y ta admira con nos Prome Minister hunto cu e ekipo di MEP ta manehando e situacion di Covid-19. Caminda cu a percura pa e bienestar di nos hendenan prome. Danki y sigui cu e bon maneho Prome Minister.

Mi ta finalisa, bisando como politico nobo, cu mi por conta cu cada un persona su sosten y confianza. Union ta haci forsa. Mi curason ta cu bo y Cu Bo Aruba ta Avansa”.

Lider di MEP, Prome Minister Evelyn Wever-Croes, den nomber di Partido MEP, a desea Erich exito den su campaña mientras e ta cana den pueblo presentado su vision. Y tambe e ta desea Erich exito den Eleccion 2021.