ORANJESTAD (AAN): Parlamentario Edgard Vrolijk di MEP ta indica cu pueblo por a tuma nota di un aliansa cu ta sostene corupcion cu ta uno hopi peligroso
y sigur un aliansa unda ta acepta y aproba tur e insultonan cu lider di AVP sr Mike Eman a dirigi na e directora di Censo y sigur na e presidente di Urna Electoral pero tambe na tur e mas di 200 empleadonan cu ta traha cu alma y cuerpo pa organisa un eleccion.
Y sigur e aliansa forma door di AVP/RED y parlamentario independiente y awor miembro di ACCION 21 Daphne Lejuez unda a dirigi un carta na Gobernador, ta mas bien un aliansa pa sostene e tata di corupcion sr Mike Eman.
Un aliansa cu ta sostene e tata di corupcion y insulto di fraude na nos instancianan y nos trahadornan
Ora a wak e carta dirigi na Gobernador mi a keda asombra. Mi por spera tur cos di AVP cu ta un partido corupto pero ora a wak cu partido RED cu semper ta papia di combati corupcion y parlamentario independiente y miembro di ACCION 21 Daphne Lejuez tambe a sostene partido AVP, tin di conclui cu nan ta sostene tur abuso verbal haci contra directora di Censo, contra presidente di Urna Electoral y tambe na e mas cu 200 trahadornan cu ta organisa eleccion y sigur unda cu ta cla awo cu nan tambe ta pensa cu e grupo aki lo ta cometiendo fraude.
Posibel coalicion AVP/RED/ACCION 21?
Ora bo wak e sosten cu AVP a ricibi aki t’un muestra cu esaki por bira un proximo gobierno di coalicion y kizas c’un partido mas. Sigur mi ta kere cu abo cu den 4 aña a pena den enseñansa awo mester wak e panorama aki cu un wowo hopi critico mes. Unda cu partido AVP den su desesperacion pa yega na poder lo ta dispuesto pa forma un coalicion cu tur partido cu saca un asiento pa por yega na poder y p’asina stroba e proceso di investigacion y ehecucion manera a pasa den pasado caba den caso di ex lider di AVP.
Y sigur abo como docente y votador mester por analisa e posibel coalicion aki hopi bon mes y sigur reflexiona si lo sostene un partido corupto mientras nos como maestro tin e tarea di educa mucha cu norma y balornan halto. Pensa cu un voto pa AVP por ta un coalicion cu RED y ACCION 21 y un partido mas y kico esaki por nifica p’abo den enseñansa.
Dia 25 di juni cada votador tin e futuro di e pais aki den nan man y sigur mi ta pidi cada un votador pa vota conciente y analisa cada intencion di awo pa eleccion y sigur analisa e aliansa di trabao nobo aki entre AVP/RED y parlamentario independiente cu ta miembro di partido ACCION 21.
