ORANJESTAD (AAN): Segun drs. Shailiny Tromp-Lee di MEP, tabata aña pasa cu Union di Piscado a acerk’e cu un set di problema cu a bira peor pa nan den e pandemia.
Asuntonan cu pa hopi tempo nan ta señala pero cu durante pandemia a bira un peso insoportabel. Mesora, como presidente di Comision Fiho di Labor y Sector Primario mi a yama un reunion cu Union di Piscado riba 18 di mei 2020.
E piscadonan a pidi pa por atende cu entre otro cu leynan, cual tratando di proteha naturalesa, tabata perhudica piscado y tabata crea situacionnan di conflicto y hasta descriminacion contra esnan cu tin como ofishi gara pisca pa hende come. E piscadonan a pidi pa por cambia e ley di proteccion di naturalesa for di uno cu tabata prohibi y perhudica piscado, pa uno cu ta regula, maneha pesca pa asina por cumpli cu ambos meta, esta proteha naturalesa y abastece pueblo di cuminda fo’i lama.
Peticion di nos piscadonan y logro:
Particularmente piscadonan tabata pidi pa por, bou regulacion cu condicionnan den permiso so,1) permiti piscamento cu harpun back, 2) permiti piscamento di kreft y calco back, 3) adapta e leynan pa maneha e especienan marino en bes di prohibi y prohibi solamente. E piscadonan a argumenta e.o. cu hasta e tratadonan ta duna espacio den diferente manera pa haci esaki.
Despues cu bou mi iniciativa, 15 di oktober 2020 Parlamento a scucha e piscadonan. Parlamento den su totalidad a pidi e parti ehecutivo di gobierno, esta e Ministernan, pa atende cu e peticion di pueblo y trece un solucion a corto plaso mirando e situacion y urgencia pa e piscadonan. Na final di cuenta, cu no a bay mes facil cu lo por a pensa, trahando hunto a logra trece cambio aceptabel riba corto plaso y cu bista pa un solucion duradero riba largo plazo. Piscadonan bou permiso estrictamente condiciona por awo pisca bou di un maneho temporal en espera di cambionan den e leynan mes.
Conclusion:
Loke mester a resalta di henter e proceso ta 1) cu e rolnan di parlamento y gobierno ta separa, 2) cu gobierno mester tene cuenta cu tur interes y cu tin ora mester por tira awa den biña pa e bienestar di comunidad, y 3) cu trahando hunto nos ta logra mas.
Ami ta para pa nos piscadonan y na mes momento pa proteccion den naturalesa. Nos mester di tur dos. Con pa logra e mihor solucion? Ami ta kere den trece otro na mesa y unda tin desacoerdo, traha pa crea un brug pa nos topa otro y yega na solucionnan berdadero y duradero. Ami ta para pa bo tambe. Acerca mi con trahando hunto, nos por logra mas.
