Den un Madiki color kibrahacha Dangui Oduber a wordo ricibi pa cantidad di simpatizante

ORANJESTAD (AAN) – Den Centro di Bario Playa Pabao, Dangui Oduber a emiti su voto, mientras cu hopi hende tabata sperando su yegada.

El a yega na un manera masha creativo y sui generis den un bus pinta na geel, mientras cu un caravana basta grandi a compañ'e.

Oduber a expresa su alegria di a eherce su derecho di voto, cu el a wordo compaa pa un grupo asina grandi di persona, y su mes famia y su team di apoyo, na kendenan el a dirigi palabranan di gradicimento. El a bisa cu Aruba su democracia awe ta mas grandi cu nunca, y el a pidi pa respeta e decision di pueblo.

E ta sinti cu MEP a wordo recompensa cu e acogida den pueblo pa tur e bon trabaonan cu nan ta haciendo, unda a sa di maneha un temporada hopi dificil di pandemia, a bin cu un campaña di vacunacion, y a ehecuta un programa pa recupera e pais su economia, y aworaki Aruba ta progresando.

El a bisa cu e bario di Madiki a bisti di kibrahacha, y el a pronostica un victoria aplastante pa Partido MEP. Asina mes el a desea exito na tur otro partido den contienda.