Dangui Oduber ta cuestiona:
ORANJESTAD (AAN): E aña aki, Aruba ta celebra 50 aña di Himno y Bandera y 40 aña di Status Aparte. Pero comunidad mester puntra su mes: Aruba por celebra libertad, si e isla ta preparando pa entreg’e? Esey ta loke Parlamentario Dangui Oduber di MEP ta cuestionando.
Esfuerso di Pueblo: Segun Oduber, e ultimo informe di CAft ta papia palabra cla: Danki na e sacrificio di pueblo y e maneho responsabel, e debe di Aruba lo baha na 47% pa aña 2028. Hulanda a pone e condicion cu nos debe mester ta bao di 50% pa nos ta un pais financieramente saludabel. Aruba a logra e meta ey caba!
Si nos a demostra cu nos mes por maneha nos cas, di con e Gobierno di AVP/Futuro tin asina hopi pura pa firma e Rijkswet HOFA? Si nos ta cumpliendo cu e normanan, no tin ningun hustificacion pa laga un hende na Hulanda dicidi kico nos ta haci cu nos placa di belasting.
Perde e bos di e ciudadano: Cu e Rijkswet HOFA, Parlamento di Aruba, e luga unda bo bos ta wordo scucha, ta keda sin poder. Tur decision final riba nos presupuesto lo mester wordo aproba na Den Haag. Esaki no ta un asunto di MEP of AVP; esaki ta un asunto di tur Arubiano cu ta kere den nos capacidad pa goberna nos mes.
Dangui Oduber ta cuestiona e ministernan Gerlien Croes y Geoffrey Wever: "Aruba ta pagando su debenan, Aruba ta cumpliendo cu e normanan, y Aruba su economia ta creciendo. Di con acepta un ley cu ta kita nos autonomia financieramente si ya nos a demostra cu nos por?"
Libertad ta sagrado. e Status Aparte a duna e isla e prosperidad cu e tin awe. Ban celebra nos historia cu dignidad, defendiendo e derecho di Aruba pa sigui dicidi su propio futuro.
