Wardacosta a actua pa asina gara y detene cuatro homber riba boto

Dos Colombiano busca por poco a huy di Aruba

ORANJESTAD (AAN): Diasabra mainta un patruya di Wardacosta di Caribe Hulandes a haya un boto para cla pa sali, cu 4 homber latino abordo.  Nan plan tabata pa bay Venezuela.  Nan a topa cu e boto den area na pier pabao di Barcadera.

   Na momento cu e personal di Wardacosta a bay controla e cuatro personanan cu ta na e boto, a haya 2 Venezolano y 2 Colombiano.  A base di loke a observa y nota, a dicidi pa bay cu e cuatro personanan y e boto na e base di Wardacosta na Savaneta.

   Dos di e personanan tabata tin nan documentonan hunto cu nan y dos otro no tabata tin ningun documento huntu cu nan. Wardacosta mesora a tuma contacto cu e ‘Unit Mensenhandel en Mensensmokkel’ (UMM) pa sosten.

   Pa colmo, Departamento di UMM a indica, cu dos di e hombernan cu nacionalidad Colombiano ta ser busca pa husticia na Aruba pa diferente robo.

   Mesora e boto a ser confisca y lo keda na base di Wardacosta pa haci mas investigacion. E personanan cu tabata ser busca pa e robonan a bay cu personal di Recherche di Cuerpo Policial di Aruba. E dos otro hombernan a bay cu personal di Guarda nos Costa. E caso lo sigui den investigacion.