Pelea na Mamoticastraat a resulta den hincamento

Sospechoso a pasa busca mas confrontacion

ORANJESTAD (AAN): Diadomingo anochi varios patruya di polis a dirigi pa Mamoticastraat na Tarabana, caminda un discusion a surgi ariba caya. Durante e discusion e situacion a agrava y eventualmente a bira un pelea formal entre e personanan involucra.

            Na yegada di polis, a constata cu un hende muhe a wordo hinca durante e pelea y mesora a wordo transporta pa Hospitaal den un auto particular pa ayuda medico.

            Autoridadnan a confirma na e luga di suceso cu efectivamente un hende a ricibi un hinca.

            Na e sitio, Mamoticastraat, polisnan a pone nan mes na recolecta tur informacion posibel pa investiga mas detaye di e incidente cu a tuma luga.

            Un rato despues cu polis a completa nan investigacion inicial, e persona cu ta sospecha di a hinca e muhe a presenta mesora na e mesun direccion cu intencion di hinca un otro persona.

            Polis ta dispone di informacion di ken e homber ta y unda e ta biba, y nan ta sigui e caso pa tuma e accion necesario.