Victima di accident fatal identifica como Ramon Rudolfo Croes di 66 aña

ORANJESTAD (AAN): Te Diamars den oranan di atardi, Polis a confirma cu a identifica e victima di e Hit & Run Fatal di Dialuna anochi riba Green Corridor, poco pariba di rotonde di Pos Chiquito.

   Famia a identifica e defunto cu ta un hende homber yama Ramon Rudolfo Croes, mihor conoci como ‘Poy”, naci na Aruba dia 28 Juni 1958 y biba na Pos Chiquito.  E tin 66 aña di edad.

   El a bira e di 11 morto den un trafico fatal y dor di un chauffeur cu a Hit and Run, y despues dos otro auto inocentemente a pasa riba dje.

   Cuerpo Policial ta haci un suplica urgente, na e chauffeur di Hit and Run pa presenta na un di e wardanan di Polis.

   Vocero policial Liliana Rasmijn, a splica cu e investigacion ta den pleno desaroyo bao guia di e specialistanan di trafico.  Autoridad sa cu tin hopi hende a mira e accident socede.  Si acaso abo a mira algo of sa algo, bo por tuma contacto cu Polis di Trafico na number: 597-5194 of 597-5191.

   Bo a mira kico a pasa bo por keda anonimo y duna bo informacion ariba e tipline 11141, nan ta garantisa bo ta keda anonimo. Cuerpo Policial Aruba y DIARIO ta manda un palabra di condolencia y forsa na e famia di e fayecido Poy den e momento dificil aki.