Vandalismo contra palapa na Eagle Beach

Palapa cendi na candela:

ORANJESTAD (AAN):  Ta increibel cu ainda tin hendenan sin escrupulo ta comete e tipo di actonan aki contra di e isla.

            Ta asina cu den oranan di Diabierna anochi Brandweer a wordo poni na altura di un palapa cu tabata na candela. Esaki na e beach dilanti di La Cabana.

            Brandweer como tambe Polis cu a bay na e luga, pero na e momento ey ya caba e candela a wordo practicamente domina. Esnan den cercania lo a uza 'brandblusser' pa paga esaki.

            Informacion suministra ta indica cu e candela a wordo cendi door di hobennan, cu ta frecuenta e area.

            Na Eagle tin camara di siguridad instala pa siguridad di comunidad. Pesey lo ta bon pa mira si pa medio di camara por mira algo y asina purba di haya e hobennan culpabel di a comete e acto aki di vandalismo den area turistico.