Un mainta preparando pa Barbecue a finaliza den panico na Santa Cruz

ORANJESTAD (AAN): Riba Diadomingo, un famia na Santa Cruz tabata prepara pa bay hasa un barbecue riba un grill,

poni net na rand di garage na un cas, situa poco pabao di Scol SPO na Santa Cruz.  Esaki ta poco panort di MFA Santa Cruz.

   Sinembargo algo a bay robez, y vlamnan a bay halto y a cuminza kima e biga y rand di e dak, y mesora a bati alarma.  Tanto Polis y Unidadnan di Bombero a sali mesora pa e adres.

   Na yegada ta topa cu candela bao un garage banda di pabou di cas. Parce cu e famia tabatin un family day cu barbecue, y aki ta unda cu e candela a cuminza.  Tin indicacion cu e grill lo a explota, creando hopi huma y cuminza kima e biga na halto.

   Algun persona presente a inhala e huma, y pesey presencia di dos Ambulans tabata necesario na e adres. Algun persona di edad a wordo saca di e cas mesora, pero asina mes lo a inhala huma.

   E prome unidad di Ambulans a transporta dos persona adulto mayor pa Servicio di Emergencia na Hospitaal, unda cu lo a haci un check up mas profundo. E di dos Ambulans a atende dos otro persona cu tambe lo a sinti nan mes malo.  Bomberonan a paga e candela, y a keda basha awa riba e parti di dak pa asina evita cu candela ta start bek.