Peaton seriamente herida ora a cruza caya dilanti un motorcycle

ORANJESTAD (AAN): Diamars anochi pa mas o menos 8:30 pm, Central di Polis a core manda tanto patruya di Playa,

y tambe unidad di Ambulance rumbo pa Avenida Milio Croes, na altura di Centro di Cuido di Guarda Nos Costa unda un peaton a wordo gedal.

   Polis rumbo pa eynan, a haya tende extra informacion cu e peaton ta benta abao riba caminda.

   Ora cu autoridad a yega, a bin nota cu e accident ta net na e T-weg di Avenida Milio Croes cu Pedro Gallegostraat parti pariba.  A haya e peaton basta grave benta abao, y aki a nota cu no ta un auto of vehiculo a dal den dje, sino un motorcycle.

   A sali na cla, cu e peaton masculino lo a subi Avenida Milio Croes di parti panort, net ora cu un motorcycle ta pasando cu un manehador cu ta rumbo pa su trabao.

   Un Docter kende ta pasando vakantie na Aruba, a mira e accident y a stop pa yuda, y el a nota cu e peaton tin heridanan serio.  Ora cu Ambulans a yega, e Paramediconan a pasa un rato fastioso cu e peaton, debi cu e tabata bisa y insisti cu e no kier yudansa, siendo cu e ta basta serio herida.

    Na final, nan a logra bay cu ne toch pa Servicio di Emergencia na Hospital.

   Polis a tuma dato, y pa siguridad a laga e motociclista haci test di supla pa check si tin posibel alcohol den curpa, pero tur cos a sali bon y tabatin tur documento na ordo.