Un grupo grandi di Polis a haya promocion

ORANJESTAD (AAN):   Na Cas di Cultura a tuma lugar entregamento di decreto gubernamental di 25 agente policial conhuntamente cu personal administrativo.

Tambe seis persona a celebra nan hubileo di 25,30,35 y hasta 40 aña dedicando nan profesion den Cuerpo Policial Aruba. Altocomisario di polis drs. Ramon I. Arnhem a haci entrega di e decreto y hubileo na personal corespondiente.

   Mr. M. Ras a celebra 25 aña di hubileo. Sra. Z. de Cuba, S. Ras y J. van der Biezen a celebra 35 aña di hubileo y mr. W. Werleman a celebra 40 aña di hubileo den Cuerpo Policial Aruba.

   Pa drs. Arnhem “E reconocimiento y promocion di nos agentenan pero tambe personal administrativo ta hopi importante pa nos organisacion. Nos ta balora cada un personal den nos organisacion. Cu miras riba nan, pa nan por sigui desaroya y progresa den nos organización. Pasobra e hende ta central.”

   Den un ambiente ameno a tuma un momento pa reconoce cada un colega policial y administrativo pa nan dedicacion, esfuerso y tempo cu nan ta dedica na e organisacion.  Di agent 1ste klasse pa brigadier: S. Tromp.  Di brigadier pa brigadier eerste klasse: V. Coffie, W. Willems, R. de Cuba, T. Bito, R. Wester, M. Wout, G. Lacle, G. Croes, S. Charles y H. Gonzalez Cabeza.

   Di hoofdagent eerste klasse pa onderinspecteur: E. Simileer.  Di onderinspecteur pa onderinspecteur eerste klasse: G. de Windt y A. Yearwood.  Di inspecteur pa hoofdinspecteur 1ste klasse : S. de Mey.

   Tambe  personal administrativo a wordo promocion di Adjunct Commies 1ste klasse pa Commies: E. Jacobs.  Tambe di Commies 1ste klasse pa Hoofd Commies  : E. Thiel-Williams y E. Penja-Luydens.

   Altocomisario ta gradici tur e famia di cada personal cu a bin na e momento special aki pa mira nan ser keri haya nan promocion. E grupo a cumpli den total di 170 aña aniversario masha danki pa boso dedicacion, empeño, esfuerso disciplina y respet cu boso tin, cu a hiba boso pa brinda e servicio sin igual pa tanto tempo.