Mast di Radio Amateur na Montaña a dobla matando turista cu tabata subiendo esaki

Net e momento ey, un turista procedente di Alemania cu ta kedando na un Airbnb na e cas Montaña 28-H na Noord, a dicidi cu pa un of otro motibo e ta bay subi un di e 3 Mast di Antena grandi cu tin riba tereno di e cas.

   E turista ta un persona certifica pa transmiti riba Radio Amateur.  E ta un persona cu ta viaha rond mundo pa asina participa den transmisionnan via frequencianan di banda Amateur cu demas persona rond mundo.  Pesey mes na e adres aki na Montaña tin Airbnb cu ta huur espacio pa Radio Amateurnan for di rond mundo bin pasa algun dia di vacacion na Aruba, y transmiti na nan antoho usando e Antenanan grandi cu tin riba tereno di e cas.

   Tur hende cu ta pasa den bario di Montaña y Sabana Liber, y Sero Janchi por mira e gigantesco Antenanan aki den halto.  Varios di e antenanan aki ta direccional y ta draai usando un rotor pa asina dirigi e yagi den e direccion corecto pa transmiti.

   E turista Bernhard Buettner mihor conoci como ‘Ben’, a yega di bishita Aruba varios biaha.  Pa un of otro motibo, Diahuebs mainta despues di 10:00 am, el a dicidi na subi un di e mastnan cu tin instala riba e tereno na Montaña.  E mast aki ta mustra di ta di basta bon condicion mas abao, pero asina cu bo bay mas halto, tin area cu ta parce di no a haya mantenimento ultimo temponan.  Fotografo di DIARIO a nota cu e parti mas ariba ta tur frustia.

   Ben a subi e Mast y a yega den e parti basta halto.  E tabatin un harnas bisti cu ta wanta cu cadena y haak, si acaso e slip cu su curpa cay.  Tin indicacion cu e lo a bira malo den halto.  Aki ta unda cu su curpa a bay colga un tiki di banda, y e peso offset aki, combina cu biento, lo a pone cu dado momento e mast aki a dobla den dos, y e parti mas ariba di e antena a bin dal full abao.  E victima a keda colga for di e Mast, como cu su safety-harnas ainda ta wantando.

   Mesora yamadanan a drenta tanto na Polis como Ambulans cu a acudi cu urgencia eynan.  Na momento cu autoridad a yega, e homber a ser baha di e situacion penoso, pero ya e no tabatin señal vital mas.  Ambulans tambe a yega, y a detecta cu e no tin pulso mas.  Asina a pidi Centro di Alarma pa manda busca un Docter.

   Cerca di 12’or di merdia, Dr. Mungra a presenta y a constata morto di Bernhard Buettner, di 59 aña di edad.

   Polis a avisa DTI pa bin haci un investigacion, y como cu ta trata di un asunto di Radio Amateur, a pone DTZ tambe na altura.  Tur hende eynan por a mira cu e Mast ta basta putri door di saltpeter.  Polis a pone Slachtofferhulp tambe na altura.

   E turista Ben Buettner ta conoci pa su ‘callsign’ DL6RAI, y e ta un persona cu tin 45 aña den mundo di Radio Amateur y tin pasion pa viaha rond mundo pa di eynan e haci transmision y opera riba frequencia.  Apenas Diasabra el a yega Aruba, pa un estadia di como 2 siman.

   Na famia di e fayecido, ta bay palabranan di condolencia.