ORANJESTAD (AAN): Diasabra anochi trempan pa 6:05 pm, un unidad di Polis di San Nicolas a ser manda den area di Misa di Brazil debi cu tin dunamento di les di core auto, pero na un forma peligroso.
Polis a yega y a bin haya un auto tipo roadster Mazda MX-5 color cora. Tras di stuur tin un dama hoben, y na asiento di pasahero tambe tin otro dama hoben. Pero mey-mey pusha den e hatchback patras tin un hoben tambe sinta. El a sinta eynan, como cu e auto aki tin solamente 2 asiento.
Polis a papia cu e dama hoben M. tras di stuur, y a papia cu e hoben kende ta sinta den e pida mey-mey patras di inicial Z.
Segun Z. a bin conta, cu e ta dunando les di core na e dama hoben M., y tambe na e pasahero sinta dilanti. Debi cu tur dos dama hoben sinta dilanti no por core auto standard, pues no sa con pa cambia speed ainda, e ora e hoben a sinta patras meymey cu su man gerek ta cambia speed pa nan.
Polis a papia seriamente cu e hoben Z. como cu e forma ey di duna les di coremento ta hopi peligroso. Ademas esnan envolví no tabatin rijbewijs tampoco. E Mazda pa colmo no tin plach'i number ni dilanti, y tampoco patras. Nan a bin cu e storia cu apenas nan a caba di cumpra e auto.
Polis a bisa e hendenan aki cu nan tin di busca un Takelwagen pa hiba e auto aki pa nan cas. Nan a mustra comprensión pa esaki.
