Tur hende a sali ileso ora cu auto a bolter riba Green Corridor

ORANJESTAD (AAN):  Diasabra mainta trempan, mientras cu na San Nicolas keto bay tin actividad di Jouvert Morning tumando lugar,

Central di Polis a ricibi informacion cu riba Green Corridor un poco pabao di e rotonde di Ser’i Tijshi un auto a bolter.

   Mesora a dirigi patruya di Polis, y na yegada a bin haya un auto sedan Hyundai Elantra color shinishi scur cu number A-40044 cu su cuatro wielnan den halto na rand di caminda.  Mesora a mira cu e ocupantenan tabata pafo caba, y ta mustra cu ningun a ricibi herida.

   Polis a acerca e personanan pa check si nan ta herida y si acaso mester asistencia di Ambulance, pero esey no tabata necesario.  Pa haya sa e causa exacto di e accident, Polis di Trafico a presenta pa haci e parti ey.  A nota cu e no a dal ni kibra ningun propiedad di Gobierno.

   Takelwagen a yega pa asina lanta e auto di eybao y hibe un lugar pa e doño.  Un suplica ta bay na comunidad pa e ultimo siman aki di Carnaval, pa maneha auto concientemente pa tur hende goza di e eventonan.