ORANJESTAD (AAN): Diasabra anochi unidad motorisa di Cuerpo Policial, a tene control den trafico despues di Lighting Parade.
Nan a detene un total di 15 chauffeur cu for di prome bista a mira cu nan tin caracteristica di ta hende bao influencia. Ora cu a pidi nan cooperacion pa supla, nan a haci esey pero e cifra di µg/l cu a aparece riba pantaya di e aparato, ta indica cu nan a sobrepasa e limite permiti na Aruba.
Pues automaticamente nan mester a baha di auto, a ricibi boei na nan man, y cu vehiculo special a wordo transporta pa Warda di Polis.
E accion di Polis ta wordo mira positivo, pasobra nan a evita cu 15 chauffeur burachi keda core riba caya y ocasiona accident. Compara cu Carnaval di aña pasa, na 2025 tabata tin 7 detencion
Cuerpo Policial ta keda haci un suplica cu si bo ta bebe no stuur. Busca Bo Amigo Responsabel (BAR). Un trafico sigur ta responsabilidad di nos tur.
