Tres auto a dal tras di otro na Piedra Plat

ORANJESTAD (AAN): Fin di siman a cuminza cu tiki malasuerte pa tres automobilista, ora cu nan tabata envolvi den un choque ‘den cadena’ na Piedra Plat.

   Esaki ta net riba e caminda principal di Pos Abao pa Hato, na altura di e Cruzada-T cu ta bay pa Sero Pita.  Un chauffeur no a regla su velocidad na tempo, y a bay dal tras di e vehiculo su dilanti.  Esaki na su turno a bay dilanti y dal tras di otro.

   Por lo menos dos di e vehiculonan aki lo no core pa e fin di siman aki.

   Polis a acudi na e lugar di accident, pa asina traha rapido pa por kita e autonan aki, y di e forma ey e rush-hour di mainta por a sigui normal.