Señora Mericano a hay'e cu problema bao superficie na Boca Catalina y no a sobrevivi

Emergencia cu turista di crusero

• E di tres turista cu a fayece den un siman di tempo 

ORANJESTAD (AAN): Diamars merdia, alarma a wordo bati cu tin un emergencia cu un persona na Boca Catalina, y ta pidi presencia di Polis y di Ambulance cu maximo urgencia.

   Na e lugar aki, un turista femenino a bay haci uzo di un asina yama “Sea Bob”.  Esaki ta un Scooter electrico cu ta nabega bao superficie di lama.  Bo ta want’e cu bo mannan, y e aparato ta rancabo sin problema sea na superficie of bao lama, pa asina bo por explora y disfruta di bida marino.  E ta manera un jetski pero cu ta opera bao awa.

   Esnan cu a mira loke a socede, a yuda core trece e dama pa oriya di lama, y como cu e no tabata reacciona a cuminza duna CPR pa trata na rebiba.  E dama ta di 58 aña di edad.

   Dos patruya di Polis, y tambe dos unidad di Ambulance a mobiliza pa e area.  Ora cu personal di emergencia, nan tambe a tuma over e trabao di CPR.  Polisnan tambe a wordo mira ta yudando cu CPR.  Nan a pone aparato pa check curason, pero ni kico nan a haci, no por a haya pulso mas.  Dado momento a stop, y paramediconan a indica cu tin di yama Docter.

   Central di Polis a core notifica demas instancianan, y a manda Docter di Team Forensico di Polis.  Asina a constata morto di e turista di nacionalidad Mericano.

   El a bira e di 3 turista cu ta muri den 1 siman di tempo, durante cu nan tabata den lama.  Kizas e momento a yega pa pone algun borchi di sugerencia pa tur bishitante cu ta drenta lama, pa tene cuenta cu nan mester tin bon condicion di salud, sin cierto dificultad, pa asina tur cos core corecto.

   Bureau Slachtofferhulp tambe a wordo envolvi pa asina duna un man.  Na famia di e fayecida, ta bay palabranan di condolencia.