Chauffeur herida den accident fuerte net riba tereno di Citgo Sero Blanco

Trot a keda pega y pone Honda acelera

ORANJESTAD (AAN): Diahuebs merdia alrededor di 12:00 pm a sosode un accidente riba e tereno di Citgo Sero Blanco, net unda un ATM Drive-Thru di Aruba Bank ta situa.

   E tabata un accidente di trafico poco comun, pero cu a spanta hopi hende debi cu e impacto a sona masha duro mes.

   A resulta cu un auto sedan Honda Civic color shinishi cu number A-79055 ta pasando banda di McDonald’s bayendo rumbo pa e stacion di gasolin.  E chauffeur masculino a indica cu diripiente e trot a pega... y esaki a pone keda aumenta di velocidad.

   El a bin pabao cu velocidad halto, y a bay dal den un SUV tipo Ford Edge color shinishi.  Debi na e impacto e Honda a bolter y keda cu su cuatro wielnan den halto.

  E prome yamadanan cu a drenta na Polis ta papia di un accident basta pisa.  Esaki a pone cu mesora varios unidad di Polis di Playa a mobiliza pa eynan.  Centro di Alarma di su banda a wordo avisa, y nan a manda un unidad di Bombero, y tambe a manda Ambulance.  Rapid Responder di Ambulance tambe a bay yuda.

   Bomberonan a yega, y mesora a uza tubonan special di sosten, pa asina kenter e auto un tiki pa asina por a saca e chauffeur di eyden.  E persona a wordo poni riba caminda, y Paramediconan a stabiliza e persona, prome cu nan por a bay cu ne rumbo pa Servicio di Emergencia na Hospital.

   Mirando cu tabata un ora hopi druk, trafico a stagna y a atrae hopi mirones.  Esey ta for di e rotonde di Sero Blanco mes bo por mira e auto gebolter na halto riba tereno di Citgo Sero Blanco.

   Brake mas fuerte cu Trot: Pa hopi decada, fabricantenan a produci auto y vehiculonan cu tin un aspecto grandi di seguridad envolvi.  Esey ta cu ni maske e Trot (throttle) di auto keda pega, e sistema di Brake a wordo diseña pa ta mas fuerte cu e motor, pues e lo yudabo stop hasta si un olifante mes ta primiendo e pedal di Trot.

   Aunke e Brake e ora ta rekeri mas forza, y distancia pa stop lo ta poco mas largo, toch si bo keda aplica presion firme y consistente na e pedal di Brake, garantiza cu e lo stop e auto.

   Corda tambe, cu e pedal di Brake ta fabrica di material aluminum alloy of staal, pues e ta fuerte y ta resistente di gastamento.  Esaki ta pa sigura cu e pedal por wanta suficiente presion sin cu e ta dobla durante Brake di emergencia.  Pues bo por pusha tur dos pia riba e pedal di Brake y e pedal lo no kibra ni dobla.  Algo importante pa keda corda riba dje den futuro.

   Na final Forensys tambe a acudi pa traha relato, y ta Takelwagen mester a move e vehiculonan kibra di eybao.