Señora adulto mayor coriendo burachi a ocasiona accident na Gasparito

ORANJESTAD (AAN): Tabata Dialuna merdia algo pasa di 12:00 pm, Central di Polis a manda patruya di Noord cu urgencia na

e birada net pabao di Zucchini Restaurant & Lounge na Gasparito debi cu auto a bolter y tin hende herida.

   E unidad di Polis cu a yega prome, a bin topa cu e accident na e area pabao di e lugar cu antes tabata conoci como Buccaneer Restaurant, pero cu awor yama Zucchini Restaurant.

   Pabao di e caminda di Palm Beach pa Koyari, a bin haya un auto sedan Kia Soluto color cora cu number A-48299 cu a kenter y a keda di banda riba acera, net pariba di cas Gasparito 10.  Tras di stuur tabatin un adulto mayor femenino, y e tabata mustra di ta OK cu minimo di herida.

   Como 20 meter mas panort, banda pariba di caminda cerca di cas Gasparito 11-B a bin haya un auto sedan Mitsubishi Lancer cu aden tabatin 3 ocupante, tur di nan adulto mayor.

   Testigonan a bisa cu e Mitsubishi Lancer tabata bayendo direccion panort, ora cu e Kia Soluto a bin masha duro for di direccion contrario, y den e birada no a keda na su banda y a bay basta den su banda robez y tabata manera bayendo pa dal frontal.  Pero toch e Kia Soluto a pasa scarmay e Mitsubishi, rascando esaki, y bay den scual, subi acera y bolter pabao di caminda.

   Ora cu Polis tabata papiando cu e señora di edad grandi di e Kia Soluto, nan a bin nota cu e tin caracteristica di ta un persona bao influencia di alcohol.  A bin sali na cla cu enberdad e ta burachi, y pesey eynan mes nan a pone boei na su man, y e Van di CEA a yega eynan pa bay cu ne rumbo pa Warda di Polis pa e wordo presenta dilanti Fiscal Auxiliar.