Cushina di Burger King na Playa a kima

ORANJESTAD (AAN): Alarma di candela a sona Dialuna atardi den Kamerlingh Onnestraat na Playa,

den e sucursal nobo di Burger King cu tin eynan mey-mey di KFC Restaurant y Sayo Supermarket.

   Centro di Alarma a haya e informe, y mesora a saca dos unidad di Bombero pa e adres.  Polis tambe a mobiliza pa e lugar, y na nan yegada a mira cu di berdad tin hopi aglomeracion di huma, cu ta parce di ta saliendo for di cushina.

   E momento ey ya caba a saca tur hende di e edificio, y nan a splica cu na prome instante nan a trata di combati e candela.  Esey a inclui algun cliente cu a purba duna un man, pero e candela a sigui expande hopi rapido y asina a dicidi cu ta mas safe pa bandona e lugar.

   Ora cu Bomberonan a yega cu dos unidad, ya e candela tabata na candela completamente.  Nan a cuminza traha mesora pa domina e candela, y evita cu e ta sigui plama.  E lugar a haya hopi daño di no djis di candela, sino tambe di huma, y di awa.   Personal di NV Elmar a yega pa desconecta coriente.  Polis a cera e parti di Kamerlingh Onnestraat e momento ey.

   E causa di e candela no a wordo divulga, pero lo wordo investiga door di Bomberonan y tambe Autoridad Hudicial di Polis.