Razzia riba cas na San Nicolas y asina descubri plantacion di marihuana

Un pareha a keda deteni

• A haya tambe hopi droga bon scondi na e cas
• Arma di candela a wordo haya y confisca tambe 

ORANJESTAD (AAN): Desde cu na Aruba a crea e division di Cuerpo Policial cu yama ‘Unit Narcotica’, nan a cuminza ricibi informacion y tip valioso di comunidad di Aruba, y contrario na loke tabata socede den pasado, e team aki si rapidamente ta actua riba cualkier tip cu drenta.

   Hendenan tabata duna tip di kende ta bende droga den tal y tal bario, kende ta subi caya y bende droga ya los den sakito transparente riba caya, den sentido di ‘delivery service’.

   Danki na e tipo di tipnan valioso, combina cu investigacion riguroso unda ta logra haya extra detaye danki na otro detencionnan, e Unit Narcotica ta cuminza busca forma pa gara e grandinan meti den droga.

   Asina nan a yega Diasabra cu tabatin suficiente informacion relaciona cu posible stock grandi di droga na un cas na San Nicolas, y mesora a pidi autorizacion di Fiscal di Ministerio Publico pa tene un razzia.

   Cu e luz berde duna pa Ministerio Publico pa tene e Entrada Hudicial, den oranan di atardi Unit Narcotica conhuntamente cu polis di San Nicolas a tene un accion grandi na San Nicolaas.

   E accion di sorpresa aki a sorprende esnan na e cas, y nan no por a ni actua mes pa core purba sconde droga, door di e.o. flush esaki den WC.

   Polis a cuminza busca rond, y mesora esnan cu a pasa parti patras di e cas a bin topa cu un plantacion di marihuana.  E matanan aki ta basta grandi y na monton patras di e cas.

   A sigui busca, y nan a bin haya diripiente bastante pakete di droga den e cas!  Esaki automaticamente a pone nan detene un homber y un muher cu tabata na e cas.

   E team a sigui busca, y diripiente a bin topa cu un arma di candela scondi, y hunto cune y bastante municion.  E hendenan aki tin suficiente municion pa ataca añanan largo.

   Vocero Policial Liliana Rasmijn, a confirma na DIARIO cu Unit Narcotica a detene e homber di inicial A.A.M. di 32 aña di edad naci na Aruba.  Tambe a detene e muher R.N.A. di 25 aña naci na Aruba.

   Tambe a confisca tur e pakinan di droga (cu parce ta pisa varios kilo).  A confisca tur e matanan di marihuana, y e arma di candela como tambe balanan.

   Vocero di Polis a expresa, cu e investigacion awor ta bay biento en popa, y esaki nifica cu lo no descarta cu lo por tin mas detencion relaciona cu e caso serio aki.  Por bisa cu loke Unit Narcotica a topa cune aki ta mihor cu un bingo!

   Unit Narcotica ta un unidad di Cuerpo Policial Aruba  cu oficialmente a wordo lanta riba fecha 1 Augustus 2023. E unidad ta investiga tur loke ta bendemento di droga for di casnan, riba caya, delivery, plataforma social y hasta area di hotelnan. Tambe e unidad ta investiga tur droga cu wordo intercepta pa Aduana di Aruba, US Customs and Border Protection na Aeropuerto, door di ambtenaarnan di KIA y tambe tur droga encontra  durante cualkier control policial.

   Pa Cuerpo Policial Aruba por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nan tipline di Polis cu ta: 111-41. Nan ta garantisa cu bo ta keda anonimo.