E cabayero ainda ta perdi
ORANJESTAD (AAN): Un mobilizacion tanto riba tera, riba lama, y for di aire a tuma lugar Diabierna merdia y atardi na costa west di Aruba. Esey ta ora cu a bira conoci, cu dos turista lo a confronta problema riba lama moviendo cu sea un Bombardier Sea-Doo of un Yamaha Waverunner cu a huur for di un Watersports estableci na Eagle Beach.
Diabierna merdia, biento tabata supla cu forza di 21 konopi (como 39 km/h), y ola di lama tabata menos di 2 pia cerca di costa, pero mas pabao e tabata modera entre 4 y 6 pia.
E dos turistanan riba e aparato ta un cabayero, y su yiu homber. Kico exacto a socede no ta conoci, pero hecho ta cu nan a nabega un tiki leu di costa y diripiente a confronta problema, y no por a bay bek direccion pariba pa regresa costa.
Y cu e ola modera, combina cu biento di 39 km/h mas o menos, nan Waverunner a cuminza drief bay mas y mas leu. Dado momento, e yiu homber cu a analisa y dicidi cu e tin kizas mihor condicion fisico, a bula den lama cu intencion pa bay bek tera door di landa.
Mientras tanto, na costa a nota cu e duo aki a tarda pa drenta bek, y asina a bati alarma na Polis. Aki a pone cu a notifica Wardacosta di Caribe Hulandes tambe, y Polis Maritimo. E Helicopter di Polis tambe a lanta vuelo y a cuminza bay bula riba lama pabao di Eagle Beach.
A dura un poco, pero nan a logra di bin mira e hoben ta trata na landa rumbo pa tera. Cu un coordinacion, a logra cu un boto a yega cerca e hoben, y a hise abordo y trece bek tera. A manda busca Ambulans pa asina check su condicion ey na beach mes.
Aki ta unda cu e hoben a duna relato na Polis, cu su tata keto bay ta riba lama, sea riba e Waverunner of lo a bula tambe den awa, of kizas e boto a bente den awa.
Diferente boto riba lama a keda busca, inlcuyendo Wardacosta di Caribe Hulandes, y e Helicopter di Polis cu mester a hasta bay yena combustible bek pa sigui cu e buskeda. Despues di par di ora, porfin a localiza e Waverunner pero no a mira nada di e tata.
A sigui cu e buskeda y a expande e zona tambe pa trata na localiza e turista. Te na ciere di edicion aki, no a tende nada mas si acaso a haya e tata perdi riba lama.
