Pustamento inespera riba Green Corridor a finaliza den accident fuerte na Wayaca

ORANJESTAD (AAN): Diasabra anochi poco despues di 7:30 pm, yamadanan a cuminza drenta na Central di Polis cu

un accident basta fuerte a caba di socede riba Green Corridor, riba e via for di Wayaca pa Aeropuerto, net un tiki pariba di Hyatt Place Aruba Airport.

   E yamadanan cu tabata drenta a duna indicacion cu e accident ta pisa, cu varios auto y vehiculo envolvi.  Pesey mesora Central di Polis a manda tanto patruyanan di Santa Cruz, y tambe di Oranjestad pa atende e accident.  Tambe a pone Centro di Alarma na altura pa informa Ambulance, aunke for di nan post mes caba nan a tende e dalmento socede.

   Ora cu Polis a yega, a bin tende mesora di testigonan cu tabatin pustamento andando entre dos auto riba e caminda, y nan a ocasiona un accident cu a envolvi un auto cu hende inocente aden, y tambe un vehiculo pickup cu tambe hende inocente aden.

   Testigonan a splica na Polis, cu un Honda Civic color blanco cu number A-7938 tabata bayendo pabao, ta pustando cu un auto color preto.  Aki un accident a socede, unda cu e chauffeur di e Honda Civic a perde control completo riba su stuur, dal den vangrails, bolter y finalisa bek riba cuatro wielnan.  El a keda total-loss probablemente.

   E auto preto cu tabata pustando, tambe a sufri sla na e body, pero el a sigui core y no a ni stop pa asumi responsabilidad.

   Debi na e dalmento aki, un vehiculo Chevrolet Colorado double-cab pickup color maron scur cu no tabata pustando, a dal y keda envolvi.  Un auto Nissan March color shinishi cu number A-30028 cu tampoco tabata pustando, a haya daño material pisa, y a keda total-loss tambe probablemente.

   Na prome instante a pensa cu ta un accident pisa, pero a bin nota cu tur hende tabata riba pia ta canando rond.  Poco despues Ambulance a atende un señora cu a cuminsa sinti dolor na curpa.

   Polis di Santa Cruz a cera caminda na rotonde Mahuma, debi cu accidente a stagna trafico.

    Diasabra mainta tambe a sosode un accidente entre 3 auto un poco mas pariba; ey nan un chauffeur bao influencia a wordo deteni.

   Contratista encarga Green Corridor a wordo poni na altura, pa yega e sitio pa mira e dañonan ocasiona door di e boksmento, traha plan pa drecha e vangrail, y haci e caminda limpi.