Candela fuerte a kima dos vehiculo y casi a cende e cas tambe

Diasabra mainta den Madiki

ORANJESTAD (AAN): Autoridad ta investigando si acaso un candela riba Diasabra mainta tabata intencional of no.  Hecho ta cu Bomberonan a yega na tempo pa evita cu el a sigui expande y kima un cas tambe.

   Diasabra den ora di mainta, Central di Polis a manda unidad di Playa cu urgencia rumbo pa Madiki, como cu net dilanti e cas Madiki 90-A tin un minivan na candela.

   Pa motibo desconoci, e Minivan aki color shinishi a cuminsa kima.  E vlamnan a sali grandi di e vehiculo aki, y a cuminsa kima un sedan Toyota Yaris color blanco cu ta su dilanti.

   Ora cu Bombero a yega, nan a bin haya e Nissan NV200 Optima color shinishi cu number A-37842 full na candela.  Debi na e rapidez di e candela, esaki a pega e Toyota Yaris color blanco cu number A-20863 tambe.

   E vlamnan tabata yega e muraya di e cas, y a hasta cuminza kita capanan di verf caba, y tabata haci kozijn di bentananan basta cayente.

   Bomberonan a yega y cu dos slang a traha pa paga e candela.  Tanto e vehiculo, y tambe e auto a kima por completo.  Den algun minuut Bomberonan tabatin e candela di e Nissan y di e Toyota domina.

   Segun e doño di e vehiculo y e auto, e candela lo por ta intencional; debi cu lo tin un of otro problema andando ey banda.  Pues un daño material considerabel; cu e perdida di un vehiculo y di un auto.