Posibel distraccion a pone chauffeur baha di caminda y destrui un SUV

Chauffeur mes a keda herida

ORANJESTAD (AAN): Tabata Diabierna anochi, cu Central di Polis a dirigi patruya di Playa cu urgencia pa Caya Frere Alexius den Paradijswijk, como cu hendenan ta raporta un accident basta fuerte cu a socede.

   E prome unidad di Polis cu a yega, a bin descubri cu un Chevrolet Aveo color blanco cu V-nummer diripiente debi na posibel distraccion di e chauffeur femenino, a baha for di caminda, subi acera y dal fuertemente contra un SUV luhoso Lincoln MKX.

   E impacto tabata fuerte, y tanto e habitantenan di e cas cu a scucha e zonido fuerte, y tambe bisiñanan a sali mesora pa mira kico a sosode.  A bin topa cu tanto e auto sedan, y e vehiculo SUV cu basta daño material.  E dama tras di stuur di e Chevrolet Aveo a keda herida.

   E parti dilanti y banda robez di e Chevrolet Aveo a bay dal fuertemente contra e parti patras banda robez di e Lincoln MKX, y a kibra bumper y tambe full e as y tambe e rear-suspension assembly, rancando full e wiel.  Parti di e front-grille di e Chevrolet a keda pega aki bao.

   Ambulans a yega na e lugar, y Paramediconan a bay atende mesora e chauffeur herida na e lugar mes, pues no tabata necesario pa hibe Hospital.