Dos V-auto a dal den otro Diadomingo mainta riba Avenida Nelson Oduber

Tabatin 2 persona herida

ORANJESTAD (AAN): Diadomingo den ora di mainta, Central di Polis a dirigi unidadnan di polis rumbo pa Avenida Nelson Oduber, na e T-weg cu Irausquin Boulevard, pues conoci como e crusada altura di Palm Beach Plaza Mall.  Esey debi cu hendenan a raporta un accident fuerte eynan.

   E prome unidad di Polis cu a yega, a nota cu falta di preferencia a hunga un rol akinan. E boksmento tabata entre dos auto di huur, esta cu V-nummer.

   Testigonan a splica, cu un auto sedan Ford Figo cu tabata riba Avenida Nelson Oduber bayendo direccion zuid, diripiente a hay’e confronta cu un sedan Nissan Versa a subi caminda inespera saliendo di Irausquin Boulevard.  Tabata mustra cu e dalmento tabata semi-frontal.  Debi na esaki, ambos auto a finaliza casi banda pariba di caminda.

   Centro di Alarma na su turno a manda dos Ambulans pasobra a haya sa cu tin dos hende herida den e Ford Figo.  Eybao na dado momento a surgi medio discusion entre personal di Ambulans y Polis.

   Ora cu Polisnan tabata papia cu e chauffeur femenino cu a keda sinta tras di stuur den e Nissan Versa, nan a bin nota cu e tin cierto caracteristica di por ta bao influencia.  Agentenan a pidi su cooperacion pa e supla, y haci un test.  El a bay di acuerdo.  Kico e resultado ta di e suplamento, no a wordo divulga.

   Paramediconan a dirigi nan atencion completamente riba e dosnan herida den e Ford Figo, y ora cu a stabiliza nan, a pone nan den brancard y cada uno a ser hiba den un Ambulans individual pa Servicio di Emergencia na Hospital pa tratamento y observacion.

   Daño material na ambos auto ta basta considerabel.