Minister Dowers a entrega e prome vehiculonan nobo na Cuerpo Policial di Aruba

ORANJESTAD (AAN): Diahuebs merdia, Minister di Husticia, Integracion, Transporte Publico y Energia, mr. drs. Arthur Dowers,

a entrega e prome vehiculonan di un orden total di 16 vehiculo nobo pa Cuerpo Policial di Aruba (KPA). E inversion aki ta forma parti di e compromiso pa sigui fortalece e departamentonan publico cu e recursonan necesario pa nan por ehecuta nan responsabilidad na un manera efectivo y profesional.

Despues di a firma a acuerdonan formalmente, Minister Dowers a ricibi e yabi for di Joylene De Nobrega, Marketing Director di Toyota Aruba y despues a entrega esaki na Altocomisario Ramon Arnhem. Ta trata aki di cinco Toyota Land Cruiser, seis Hilux, dos HiAce Van, dos Commuter Van y un Toyota Fortuner.

E entrega ta tuma luga apenas un dia despues cu Minister Dowers, hunto cu mando di Brandweer Aruba, a presenta dos di e tres Rosenbauer PANTHER 6x6 Aircraft Rescue and Fire Fighting (ARFF) nobo. E tres vehiculonan specialisa representa un inversion total di Afl. 8.488.483,12 y ta destina pa fortalece capacidad operacional y siguridad na Aeropuerto Internacional Reina Beatrix.

Pa Minister Dowers, tur dos inversion ta parti di un mesun vision: un servicio publico cu ta funciona optimalmente mester conta cu material adecua, pero tambe cu profesionalnan cu ta bon prepara pa haci uzo di e recursonan aki.

E vehiculonan nobo di KPA lo contribui na mehora mobilidad y disponibilidad operacional di Cuerpo Policial, facilitando e trabao diario di e agentenan cu ta sirbi y proteha comunidad. E pedido di 16 vehiculo ta representa un paso adicional den e proceso pa modernisa y fortalece e recursonan cu KPA tin na su disposicion.

E mesun principio ta conta pa e inversion recien den Brandweer Aruba. Cada un di e vehiculonan ARFF ta conta cu e ultimo tecnologia pa responde na emergencia di aviacion. E inversion den material ta bay pareu cu preparacion, entrenamento y experencia di e personal cu tin e responsabilidad pa opera e ekiponan specialisa.

Minister Dowers ta enfatisa cu inversion den sector publico mester tin como meta final un miho servicio na e ciudadano. Esaki ta exigi no solamente un maneho responsabel di fondo publico, sino tambe inversion continuo den e capacidad humano di e organisacionnan publico.

Minister Dowers su compromiso ta pa sigui inverti den nos hendenan, den mehora nan condicionnan di trabao y den e recursonan cu nan mester pa sigui sirbi y proteha nos Pais.

E inversionnan den KPA y Brandweer ta ilustra e rumbo pa sigui modernisa e organisacionnan publico, fortalece nan capacidad operacional y duna e profesionalnan cu ta traha tur dia pa Aruba e hermentnan y preparacion necesario pa cumpli cu nan tarea.