Polisnan rumbo pa asistencia a haya accident na Piedra Plat

Dos vehiculo y 2 auto envolvi

ORANJESTAD (AAN): Tabata Diasabra atardi banda di 5:00 pm, cu un unidad policial di distrito Santa Cruz a haya su mes envolvi den un accidente di trafico, net dilanti Flatstone Supermarket na Piedra Plat. Un total di 4 auto y vehiculo tabata envolvi, incluyendo e patruya di polis.

   Testigonan a splica, cu e patruya di Polis bahando di Santa Cruz rumbo pa Paradera, cu zwaailicht sendi a bay pasa autonan su dilanti pa sigui cu urgencia pa nan asistencia, relaciona cu persecusion di un auto preto, di cual e chauffeur a caba di horta un iPhone 15 di un bendedor na Santa Cruz.

   Un di e autonan cu nan ta pasando, tabata un vehiculo Volkswagen Amarok pickup double-cabina cu net eynan a bay sorteer pa bira na su man robez pa drenta e parkinglot di Supermarket.  Testigo a bisa cu Polis tabatin zwaailicht cendi, pero sin sirena.  Esaki kizas ta e motibo pakico chauffeur di e Volkswagen Pickup double-cabina no a mira nan ta bin su tras y ta pasando auto.

   E Polis na stuur no por a haci mucho, y aunke el a trata di maniobra, el a bay dal contra e Volkswagen Amarok Pickup cu number A-26858 y dos otro auto mas staciona riba parkinglot.

   Testigo a splica cu e accident por a termina malo pa doño di un di e autonan, cu net a yega y a baha for di su auto y a scucha e zonido duro. El a core hala mesora y net momento cu e pickup Volkswagen a bin pega contra su Mitsubishi Lancer shinishi cu number A-3143. 

   Den e vehiculo Isuzu unidad policial D-506, ambos agente a resulta levemente herida y mester bisa cu tabata trata di un impacto basta duro, mirando cu tur airbag a sali.  E vehiculo policial a sufri hopi daño dilanti.  Tabatin un sedan Hyundai Sonata A-22330 tambe envolvi.

   Paramediconan a yega, y a controla e agentenan, y a papia tambe cu chauffeur masculino di e Volkswagen Pickup.  A manda busca Specialista di Trafico, cu den caso asina tin di haci investigacion completo.

   Pa awor, distrito di Santa Cruz tin un unidad policial menos.