Apenas e siman aki nan a yega Aruba
ORANJESTAD (AAN): Tabata Diabierna banda di 12:15 pm, cu Central di Polis a wordo notifica cu un turista a haya problema serio den awa na Baby Beach.
Esaki tabata suficiente pa Central di Polis a manda su unidadnan di San Nicolas rumbo pa eynan, y tambe a notifica Centro di Alarma, cu a saca unidad di Ambulans for di ImSan rumbo pa eynan.
Na momento cu Polis y Ambulans a yega eynan, a bin topa cu un grupo di persona na oriya di lama, ta practicando CPR riba e victima. E ta mustra di ta un homber adulto, y e no tabata reacciona.
Ambulans a yega rato despues, y mesora Paramediconan a tuma over y sigui cu CPR, y a conecta aparato tambe na su curpa pa monitor, y tin biaha pone curpa na banda pa saca awa.
E proceso di trata di reanima a sigui pa basta minuut, pero ningun reaccion tabata ricibi mas di e victima. Ora cu nan a pasa e minuutnan aceptable pa reanimacion, a dicidi na stop. A pidi Centro di Alarma pa manda Docter pa e lugar.
Polis na nan turno a pidi pa presencia di demas autoridad halto, y a pidi pa presencia di Bureau Slachtofferhulp pa bin respalda e famia.
Despues Docter a yega, y a constata morto di e turista procedente di Brasil, di 42 aña di edad. Despues di esaki a dicidi na move e restonan mortal for di oriya, y a bay banda di caminda cune, sperando yegada di shersh di Funeraria.
Vocero di Polis a splica cu e famia turista aki apenas e siman aki a yega Aruba. Y e tabata lama hunto cu un conocir, kende dado momento a detecta e problema y a grita auxilio. Tabatin dos hoben riba beach cu a drenta lama pa yuda sak’e.
Ta conoci cu e fondo di Baby Beach cerca di oriya no ta seco tur caminda. Diripiente bo por topa cu un pida hundo cu ta sorprende landadornan. Si bo no sa landa, personanan por bay den e parti hundo, drenta den panico pasobra no sa con pa bay bek na superficie, y esaki por ocasiona situacion cu ta empeora.
Bureau Slachtofferhulp a keda encarga cu e famia pa sostene nan. Na famia di e fayecido, DIARIO y Cuerpo Policial ta ofrece palabranan di condolencia.
