Bendemento di iPhone riba Facebook a resulta den detencion

‘Cumprador a rek careda huy cu e smartphone’

ORANJESTAD (AAN): Na numeroso ocasion cosnan similar a pasa caba na Aruba.  Na varios ocasion a yega di socede na e.o. banda di Veld di Pos Chiquito, tambe den area di Pos Abao.  Hecho ta cu hendenan ta pone nan smartphone of otro aparato costoso “For Sale” riba social media, y ta haci palabracion pa “topa otro” na un lugar pa asina cumpra e aparato.

   Den pasado, DIARIO a yega di recomenda tur hende pa haci esaki dilanti Warda di Polis cu ta un lugar safe pa haci e tipo di transaccion aki.  Si acaso e cumprado no kier bay dilanti Warda di Polis... anto djis lubida riba e cumprado ey.

   Recientemente un persona a pone su iPhone 15 na benta riba Social Media.  Un homber a reacciona bisando cu e ta interesa pa cumpra esaki.  Nan a palabra cu Diasabra 17 di Februari 2024 nan lo topa otro na altura di Citgo Santa Cruz pa efectua e compra.

   Atardi ey, e bendedor a yega na Santa Cruz y wardando pa e cumprador.  E cumprador a yega den un auto compacto color preto, y asina a cuminsa cu e negociacion.  Pero a bin sali na cla cu e homber no tin intencion di cumpra mes, sino mas bien move cu su auto mesora asina cu e tin e smartphone den man, y sin paga!

   Diasabra atardi, Central di Polis a ricibi yamada cu e ladronicia aki a caba di tuma lugar.  E homber sinberguensa a dicidi bay cu e iPhone 15 sin paga p’e.  E victima a informa cu esaki a socede na Gasoline Station di Santa Cruz, y a informa cu e homber a huy den un auto hatchback Toyota Passo color preto cu stuurwiel na banda drechi, cu number A-48487.  E auto a tuma direccion nort, pues Piedra Plat pa Paradera.

   Central di Polis mesora a manda un unidad di Polis pa Santa Cruz, y demas patruyanan riba caya a wordo notifica pa tene bista pa e auto aki.  E unidad cu a yega Santa Cruz, a papia cu e persona y el a bisa cu nan a caba di horta e iPhone 15 cu e tin na benta.  E persona cu el a kere ta un cumprador honesto, a resulta di ta djis un ladron first class.

   Pero e iPhone 15 ta dispone di e app di “Find my Phone” cu lo yuda e doño legitimo sigui via GPS e localidad di e aparato.

   Un unidad di Polis di Noord cu tabata pasando den Tanki Flip, a mira e Toyota Passo aki ta bayendo direccion pabao.  E unidad di Polis mesora a bay su tras, a pone sirena y zwaailicht y a obliga e auto para net pariba di rotonde di Tanki Flip, dilanti Dunkin’ Donuts.

   Polisnan mesora a detene e homber ladron aki, y a bay cune pa Warda di Polis cu man na boei.  El a wordo presenta dilanti Fiscal Auxiliar, kende a duna ordo pa e keda deteni.  Recherche lo bay investiga pa haya sa den cuanto caso similar mas e ta envolvi, pues di ta “pasa man pa cos” cu no ta di dje.

   Conseho na comunidad: Si bo kier bende algo, haci esaki den dia y dilanti cualkier Warda di Polis.