Polisnan haciendo nan best pa trankiliza e dos muchanan

Caso fatal na Pos Chiquito

ORANJESTAD (AAN): E tiramento di Diasabra marduga den e seccion nobo di casnan na Pos Chiquito, posibelmente a socede den bista di dos mucha.  Nan ta yiu muhe y yiu homber di e victima Didi, kende a ricibi impactonan fatal na su curpa.

   E victima Didi Vlaun ta biba na e cas hunto cu su pareha, su mama, y tambe su dos yiu chikito.  Uno di nan ta mucha muhe kende ta bay haci 9 aña na December venidero, y e otro yiu homber lo cumpli 2 aña na November awor.  Nan tambe a bay pafo pa mira kico a socede, y posibelmente a topa cu e situacion cu nan mama abao den plas di sanger.

   Polisnan cu a yega, y mirando tur hende na yoramento, mesora a dicidi na haci algo pa minimaliza e daño sicologico riba e criaturanan aki. Pues nan a hisa y aleha e muchanan for di e area aki, move bay te dilanti cas di bisiña pa asina nan por hala rosea trankilo, y purba na calma nan.

   E muchanan aki tambe tabata na yoramento mirando cu nan a nota con nan wela tabata yora.  Polis a aleha nan y bay haci e obra humano di trankiliza e muchanan aki, mientras cu otro agentenan tabata druk ta haciendo e investigacion.

   Polis a pone nan para banda di un Jeep di Polis pa papia cu nan.  Personal di Ambulance tambe a yega cerca pa check e condicion di e muchanan.  Un agente Policial a pone un paña eybanda pa asina yuda nan cu e frieu di anochi.   Miembronan di prensa a keda impresiona cu e dedicacion di e agentenan aki pa asina percura pa e muchanan a wordo aleha di e zona di crimen.  Aunke e criatura di 1 aña kizas lo no corda nada di esaki ora cu e bira grandi, toch esun di 8 aña cu ya ta bayendo Scol Basico, lo por keda corda e momentonan aki pa resto di su bida.  Pesey Polisnan kier a minimaliza e impacto, y tabata un gesto honorabel di mira.