Por ta esun di Drive-by Shooting fatal...
ORANJESTAD (AAN): E caso di Drive-by Shooting fatal di Diasabra marduga na Pos Chiquito, tabata keto bay bao investigacion incansabel e mainta ey, ora cu diripiente pa 10:20 un yamada importante a drenta.
Hendenan a bin mira un auto compacto riba caminda di Rooi Taki pa bay Deposito di Wela cerca di Rooi Frances.
Inmediatamente unidadnan di Polis a mobiliza pa e area, y enberdad a bin haya un auto compacto Kia Rio hatchback di cinco porta, color shinishi den e pida mondi. Mesora Polisnan a seya e area, y a confirma na Polis.
E marduga ey durante tiramento, tin varios security camera cu a capta imagen di un hatchback di 5 porta ta huy despues di a los cinco tiro riba un cas, matando un dama den su cura di cas.
Ora cu a check e number di auto, a bin realiza cu esaki ta un Kia Rio procedente di joyriding. Pues e auto a wordo horta door di e criminalnan, pa asina por a bay tira na Pos Chiquito. Pero esaki tin di wordo investiga na forma forensico, pa check si ta detecta mancha di polvo di municion riba e body.
Pesey e team forensico di BFTO a bay na Rooi Taki pa haci e promer analisis, y despues cu Takelwagen e auto a wordo hiba pa Warda di Polis pa investigacion mas profundo por sigui, y check kico mas importante por haya den esaki.
Si abo ta corda unda bo por a mira e auto aki ta coriendo Diabierna anochi y Diasabra marduga, yama Tipline di Polis na 111-41 pa yuda cu e investigacion. Corda cu bo por keda anonimo. Vocero Policial a indica cu probablemente e Kia Rio aki por tin conexion cu e caso di asesinato.
Riba e potret por mira e area unda e auto a wordo haya, y tambe por mira un imagen di archivo di e modelo Kia Rio shinishi.
