Polisnan di diferente distrito ta bay enfrenta otro den tur tipo di deporte

Siman di Polis a cuminza:

ORANJESTAD (AAN): Diahuebs a tuma lugar apertura di e siman di polis, unda cu tabata tin un desfile, despues di cual a cuminza cu un competencia di volleyball.

Durante e siman di polis e agentenan di e diferente distritonan lo enfrenta otro den diferente ramo di deporte, como tambe entre otro domino, cu tabata poni riba e programa pa Diahuebs anochi.

Den un entrevista Inspector Davir Leer, presidente di e comision organizatorio di e actividad, a splica cu e intencion di e siman (Corpsweek) ta un preparacion pa e Misa cu ta bay tuma lugar otro siman.

“E aña aki nos a dicidi di pone e parti di deporte prome cu e Misa”.

Nos enfoke ta hopi riba pa trece mas union den e Cuerpo Policial, pero tambe pa e agentenan haci deporte cu otro, cu ta algo sano, segun Leer.

El a indica cu asina e polisnan ta keda mas uni, door di conoce otro mihor tambe.

E distritonan lo competi contra otro, mientras cu e departamento di Recherche tambe a forma un team special cu lo participa.