Bultonan di droga cu tabata drif riba lama a yega costa di Aruba

Nan ta relaciona cu accion di Zr.Ms Groningen di siman pasa

ORANJESTAD (AAN):   Manera DIARIO a trece dilanti siman pasa, Guardacosta di Caribe Hulandes ta basta ocupa relaciona cu e cantidad di accionnan di contrabando ilegal cu ta sosode den lama Caribe den e region.

            Cantidad di droga a wordo confisca recientemente for di personanan cu ta envolvi den rednan criminal di traficacion, no solamente di droga, pero tambe di hende.

            E ultimo cargamento di droga cu a wordo incauta a sosode dia 10 di Augustus ora cu Zr.Ms. Groningen a detecta un barco sospechoso meymey di lama y ora cu nan a bay den nan direccion, e purba di huy den e asina yama go-fast.

            E intento di huy a fracasa y ta asina cu e logra gara algun persona riba e go-fast, kendenan prome a purba di tira algun bulto di droga den lama. Apesar cu a logra haya algun di e pakinan, otronan a keda drif.

            E bultonan aki cu a perde ta esunnan cu a drif y yega na e costa panoord di Aruba riba diasabra.

Guardacosta a confirma cu e bultonan aki cu contenido di droga ta procedente di e accion cu e barco Zr.Ms. Groningen a realisa dia 10 di augustus ultimo.

            Diasabra  atardi e bultonan aki a drif yega Aruba. Cuerpo Policial di Aruba hunto cu Guardacosta a atende e caso. Esaki no ta trata di un caso nobo, pero di e caso cu a tuma luga 10 di augustus ultimo. Tabata trata di casi 550 kilo di droga, di cua 100 kilo ta di marihuana y 450 kilo di cocaina cu a wordo confisca den e caso aki.