Persecusion di Ser’i Tijshi te Camacuri y chauffeur a bisa cu e no a tende ni mira Polis

A gar’e ora el a drenta un caya sin salida

ORANJESTAD (AAN): Riba Diabierna anochi, unidadnan Motoriza di Polis a bay haci un control riba trafico, pa controla e movimento di trafico pisa riba Green Corridor.

   Den e control aki, tabata check e.o. coremento demasiado duro tambe.  Diripiente e Polisnan a detecta, cu un Chevrolet Pickup color shinishi ta bahando cu velocidad halto bayendo pabao rumbo pa Playa.  Na altura di rotonde di Ser’i Tijshi nan a duna e chauffeur suficiente señal pa e stop.

   Pa nan sorpresa, aunke e chauffeur a mira nan, el a dicidi na djis sigui primi trot y a pasa bay.  Kizas e chauffeur tabata desea tiki mas aventura riba su Diabierna anochi.

   Mesora unidadnan di Polis a start nan motor y a bay su tras, y mesora a raporta e persecusion aki via Tetra Radio di Polis pa mas unidad ta na altura.

   Nan a sigui core bay pabao, y despues bira den cayanan, y a finaliza den un caya pariba di Camacuri Apartments.

   E chauffeur dado momento a drenta den un caya sin salida, y eynan e no por a haci nada mas djis rindi y entrega su mes.  Pasobra Polisnan a blokea e salida su tras.

   E homber a wordo baha, y mesora a pone boei na su mannan.  E homber a bin cu e storia increibel, cu e “no a mira” y tampoco “no a tende sirena di Polis” su tras.  Aki sigur Fiscal lo bay tene cuenta cu tur esaki, y kizas recomenda pa kita su rijbewijs tambe pasobra un persona no por core auto si acaso e no por mira señal, ni tende sirena.