Rodney Solognier di Sindicato SPA:
ORANJESTAD (AAN): Segun Rodney Solognier di Sindicato SPA, ta di lamenta cu e Gobierno actual a para e proyecto di Warda di Polis na ex-Codemsa na Cumana na unda cu e intencion tabata pa pone tur departamento di husticia bou di un solo dak na e localidad aki. Di e manera aki tambe, lo a spaar den huurmento di mas edificio pa tur e departamentonan.
El a remarca cu e Gobierno anterior a priminti nan cu e proyecto aki ta un ‘done deal’ y cu probablemente lo corta sinta na e edificio di Codemsa na december venidero.
El a agrega cu e actual Minister di Husticia Arthur Dowers a informa nan cu esaki no ta factibel mas mirando cu prijsnan a subi y lo bin un otro facilidad. Tambe e minister a informa nan cu tur cos no tabata cla manera e minister anterior a informa nan. Por lo tanto, e no sa si ta trata di un capricho politico of no. Pero e ta lamenta si cu e proyecto a wordo para na unda tur e departamentonan aki lo ta mas cerca di otro y lo spaar hopi placa riba huurmento di mas edificio.
