Ama di cas a keda gravemente herida ora di haci cashi limpi

Caso serio na Paradera

ORANJESTAD (AAN): Diahuebs merdia poco despues di 12’or, yamadanan urgente a drenta cu tin un señora tur na sanger net panort di e T-Weg cu tin pariba di Great Rich Bar & Restaurant na Paradera.  Mesora Central di Polis a manda patruyanan di Santa Cruz, y a notifica Ambulans.

   E prome unidad di Polis cu a yega, a bin haya un señora riba acera banda pabao di caminda, cu ta manera den semi-shock ta perdiendo hopi sanger debi na cortanan severo y profundo na su curpa.  Mesora a pidi pa Ambulans yega cu maximo urgencia.

   Polis a bin compronde, cu e señora ta di e cas pariba di caminda, esta Paradera 139.  Riba Diahuebs e tabata haciendo cas limpi, y su intencion tabata pa haci un cashi di glas limpi.  Sinembargo algo a bay malo ora cu parti di e cashi of artefactonan aden a sali cay kibra, y esaki a corta un pida grandi di su braza drechi, y mas parti di su curpa.

   Herida tabata profundo, y a corta un ader principal cu tabata cuminza basha sanger profusamente.  Mesora e señora a opta pa sali di cas, subi caya pa asina pidi yudansa.  Pero riba e acera el a perde hopi sanger, te cu el a sak den otro.

   Paramediconan mesora a check su señal vital, y como cu tin hende eybanda cu ya caba a uza pida paña pa mara un ‘tourniquet’ na e braza pa reduci sangramento.  Paramediconan a logra stabiliza e victima, y a informa Polis cu nan tin di bay cu sumo urgencia pa Hospital.  Pero e momento ey trafico ta druk, y a haya permiso pa un patruya di Polis bay dilanti pa habri caminda pa asina Ambulans por yega mas rapido.

   Esey a socede tambe, y den un rato di tempo a yega Servicio di Emergencia na Hospital.  DIARIO ta desea di gradici tur boluntario cu a yega eynan pa purba yuda e señora.