ORANJESTAD (AAN): Habitantenan di area di Moko riba Diasabra poco prome cu 6:00 am, ora cu ainda solo no a sali, nan a tende un sonido masha fuerte mes, y instantaneamente coriente a bay!
A resulta cu un auto a pasa dal y ranca un palo di luz di voltahe halto.
Mesora a yama Polis, cu den un rato di ora a yega na e lugar di accident. A bin topa cu un Honda CR-V color scur cu number A-33166 tur destrui y pega contra un baranca grandi banda di caminda. Prome cu esey, e chauffeur a baha di caminda y ranca un palo di luz, y finalmente termina na e baranca.
Polis a mira cu algun dama a saca e chauffeur femenino y nan ta prepara pa bay cune for di eybao. Polis a yega cerca y a bin nota cu e muher ta mustra di ta visiblemente bao influencia pisa di alcohol. Como cu e tin algun herida na su curpa, a laga Ambulans bin na e lugar.
Personal di NV Elmar tambe a wordo yama, como cu tabatin hopi waya benta abao, y ademas tin full un palo di luz pa bay drecha.
Paramediconan a atende e muher, y a nota cu tin di bay Hospital cune pa mas asistencia.
Personal di NV Elmar a yega y a percura pa activa fuse pa algun otro area por a haya coriente. Sinembargo e casnan hopi cerca di e lugar di accident a keda hopi ora largo sin coriente, pa asina por pone un palo di luz.
https://diario.aw/categories/noticia/policial/muher-tras-di-stuur-a-bay-ranca-palo-di-luz-na-moko#sigProIdb09f286c00
