Polis a hala atencion di motociclista coriendo cu un mucha chikito sinta su dilanti

ORANJESTAD (AAN): Diaranson merdia, un unidad di Polis cu tabata patruyando a mira con un motorcycle ta coriendo y tabata parce cu e manehador tin un mucha hopi chikito mes sinta riba e tanki di gasolin.

   Polisnan a bira nan unidad y a bay papia cu e motociclista kende a para dilanti un Supermarket.  Aki nan a mira cu enberdad e tin un criatura chikito cu un helm riba su cabez, y un popchi bunita asina den su man teni.

   E unidad di Polis a papia cu e motociclista, pa bise cu como adulto, tin un extra responsabilidad na momento cu bo ta coriendo un brommer, unda cu ni maske con cauteloso bo ta riba caminda, hopi biaha casonan serio ta socede debi na otro automobilista of coredornan cu no ta mirabo, y causa un accident.  Esaki ta bira hopi serio, na momento cu un motociclista ta transportando un mucha asina chikito.

   Hasta si bo slip mes cu e motorcycle, e mucha chikito no tin proteccion manera cu lo bo tin ora cu bo ta den un auto of otro vehiculo cu tin un frame y chassis pa protehabo.

   Polisnan a splica e motociclista cu loke e ta haciendo cu e criatura ey ta hopi peligroso, y pa tal motibo nan a hala su atencion cu e tin di busca un otro forma pa transporta e mucha muher chikito aki.

   E motociclista a mustra cu a lo menos el a busca un helm pa proteha e mucha, aunke pa Polisnan esey no ta suficiente. Nan kier pa e motociclista compronde riba e seriedad.  Enberdad e helm por proteha e mucha di heridanan serio na cabez, y heridanan traumatico na craneo, toch cualkier otro herida por impacta e mucha pa cu su crecimento y mas.