Hues a pospone caso pa laga investiga DNA riba revolver

Den caso di intento di mata cu arma di candela na Meiveld

ORANJESTAD (AAN): Diabierna mainta, Hues a bay di acuerdo cu e proposicion di Fiscal y a ordena pa laga haci investigacion di DNA riba e revolver cu a haya den un caso di intento di mata, caminda un persona a resulta herida.

   Intento di mata: Fiscal ta acusa e sospechoso homber Z.T. di 20 aña di Hulanda biba na Aruba, cu riba 9 Mei 2024 el a purba di mata e homber E. y tambe ta acusa Z.T. di posecion di un arma di candela, den un situacion serio cu a socede na Meiveld den area di un Supermarket grandi.

   Investigacion forensico riba arma: Hues a bisa cu na December 2023, a cuminsa trata e caso pero a pospone e caso pa haya resultado di Instituto Forense na Hulanda (NFI) di DNA for di e revolver. Hues a bisa cu abogadonan di Z.T., mr. de Kort y mr. Ras, a pidi pa scucha e victima, homber E., como testigo.

   Ta asina cu E. a presenta den sala di Corte. Hues a pidi’e pa e sinta pafor di sala warda te ora e worde yama pa duna declaracion. Despues cu E. a sali, Hues a bisa cu e resultado di DNA ta mustra cu ta di un persona pero no sa kende. Hues a puntra si lo mester tuma muestra di Z.T. pa laga Instituto Forense na Hulanda (NFI) determina si e tabatin e arma. Hues a puntra Fiscal su opinion.

   Fiscal a bisa Hues cu e investigacion ta mustra cu tin indicacion di un persona y tambe di un otro persona. Fiscal a splica cu el a puntra NFI na Hulanda, cuanto tempo lo dura pa haci investigacion. Nan bisa cu 4 siman ora haya e muestra.

   Fiscal ta di opinion cu lo mester haya muestra di sospechoso Z.T. Fiscal a sigui bisa cu tambe e kier si e testigo E. kier coopera pa duna muestra. Sino e ta pidi Hues pa ordena E. pa duna muestra.

   Abogado ta reacciona: Hues a puntra Z.T. si e tabatin e revolver den su man. Ta asina cu Z.T. ta insisti y ‘para riba’ cu e no a mishi cu e revolver cu lo a worde usa pa tira.

   Abogado mr. Ras a reacciona cu na Augustus 2024, a tuma muestra di Z.T. pero a dura hopi promer cu esaki a yega NFI. E abogado a bisa cu e huls di revolver tambe lo tin DNA. El a bisa cu tabatin un luchamento entre Z.T. y E. E ta puntra si ta asina necesario pa haci investigacion.

   Fiscal ta insisti: Fiscal a remarca cu despues di e luchamento, E. mes a coy e revolver y a tira cu esaki, pues no ta nada straño cu lo tin su DNA riba e revolver. Fiscal ta insisti pa laga tuma muestra pa asina NFI haci investigacion di DNA.

   Hues a ordena pa haci investigacion: Hues a bay pensa un rato pa tuma un decision. Ora Hues a bolbe den sala di Corte, el a bisa cu e ta haya necesario pa tin DNA di e sospechoso y e testigo pa asina haya sa kende tabatin e arma. El a dicidi cu ta manda e caso pa Hues Comisario pa ordena E. pa duna muestra pa haci investigacion di DNA.

   Hues ta haya cu ora tin resultado di Instituto NFI, lo bay scucha E. como testigo. Hues a propone 28 Mei pa 1.30 di merdia lo bay sigui cu e caso.

   Hues a yama E. pa bay den sala di Corte y a puntr’e si e ta dispuesto pa duna muestra pa laga investiga DNA. E. a bisa cu e ta dispuesto. Esey ta nifica cu muestra di e victima E. y e sospechoso T.Z. lo worde manda NFI Hulanda pa investigacion.