Mericanonan cu narcotica den maleta
- Razzia na Koningstraat a produci droga y tambe revolver
ORANJESTAD (AAN): Danki na e dinamico Unit Narcotica di Cuerpo Policial di Aruba, sin duda alguno ultimo dianan a percura pa Baho Mundo a haya golpi, debi na diferente detencion cu nan a ehecuta, y tambe varios droga y arma di candela cu na final a ser kita fo’i caya.
Unit narcotica cu varios detencion den e ultimo dianan tras di lomba, y en total a haci 3 detencion siman pasa na Aeropuerto Internacional Reina Beatrix.
Ta trata di 3 pasahero masculino di nacionalidad mericano cu tabata biniendo for di Merca cu droga den maleta.
Diaranson tambe Unit Narcotica a haci un detencion na un cas na Koningstraat na Playa, y esaki a socede durante un Razzia bao aprobacion di Ministerio Publico. Na e razzia aki, Departamento di team di Aresto como tambe personal di K-9 a forma parti di e Entrada Hudicial.
Eynan na Koningstraat nan a detene un homber naci na Aruba. A confisca un arma di candela como tambe cantidad di droga (cocaina, marihuana y hash)
Vocero Liliana Rasmijn di Cuerpo Policial, a bisa cu no ta descarta cu lo tin mas detencion durante e dianan nos dilanti di e departamento di Unit Narcotica.
Pero toch ta haci un suplica un biaha mas na comunidad, specificamente esnan cu sa algo of a wak algo yama e tiplijn di polis cu ta 111-41.
